Na reunión mantida coa veciñanza en Merza, achegáronse copias de alegacións
para presentar en contra desta ampliación antes do 10 de marzo de 2023
Ecos da Comarca/Vila de Cruces
O BNG mantivo unha reunión coa veciñanza de Merza para explicar en que consiste o proxecto de ampliación do vertedoiro de Campomarzo, do que o pasado 22 de febreiro saía a exposición pública o estudo de impacto ambiental e a solicitude de modificación substancial da autorización ambiental integrada para o vertedoiro de residuos de Bander Residuos, S.L.U.
O voceiro do BNG cruceño, Alex Fiuza, tildouno "de auténtico atentado medioambiental e para a vida do noso rural". "Os riscos deste proxecto son moitos: vertido de metais pesados ao medio e aos leitos próximos, liberación de gases polo proceso de descomposición, creación de atmosferas explosivas e falta de osíxeno con risco de
incendios, tránsito de camións, afectación a hábitats prioritarios, a especies catalogadas como vulnerábeis e algunhas en perigo de extinción... A perigosidade que conleva este proxecto, afecta directamente á parroquia de Merza polas filtracións de dito vertedoiro ao río Toxa, previo á captación municipal de auga potable".
Polo que desde o BNG xa se están a levar a cabo unha serie de accións. "Por unha banda presentouse unha proposta non de lei no Parlamento Galego para o rexeitamento da solicitude de modificación substancial da autorización ambiental integrada para o vertedoiro de residuos de Bander Residuos, S.L.U, no concello de Silleda. Que se proceda á restauración integral da canteira e realizar o baleirado de todo material impropio depositado na mesma dende o ano 2002, ben pola empresa propietaria, ou pola Xunta, por ter devolto o aval sen esixirllo".
E insiste en que é necesario "actuar de inmediato para impedir a filtración de lixiviados cara a zona circundante e os leitos da balsa mineira existente e sin restaurar e realizar unha avaliación dos terreos ocupados polo vertedoiro e os circundantes para determinar a posíbel contaminación existente".
A nivel local, o BNG de Vila de Cruces, lamenta "a falta de interese por parte do goberno local" e presentará unha moción no pleno ordinario deste xoves para instar ao goberno local "ao rexeitamento do proxecto, así como a elaboración de informes técnicos e alegacións contra o vertedoiro, ademais, a que dende o Concello se inste á Xunta a paralizar esta catástrofe medioambiental".
NOTICIAS RELACIONADAS:
O BNG levará este tema ao Parlamento: https://www.ecosdacomarca.com/post/o-bng-levar%C3%A1-ao-parlamento-a-posta-en-marcha-do-antiguo-vertedoiro-de-campomarzo-en-silleda
Anuncio da reunión do alcalde cos veciños: https://www.ecosdacomarca.com/post/cui%C3%B1a-manter%C3%A1-o-venres-un-encontro-ca-veci%C3%B1anza-afectada-polo-proxecto-para-o-vertedoiro-de-pazos
O Concello de Silleda alegará a este proxecto: https://www.ecosdacomarca.com/post/o-concello-de-silleda-alegar%C3%A1-ao-proxecto-do-vertedoiro-en-campomarzo