O BNG denuncia que a Xunta incumpriu "o de iniciar no 1ª semestre as obras da PO-840 en Agolada"
- ecosdacomarca
- 4 jul
- 2 min de lectura
Ecos da Comarca/Agolada
O BNG denunciou onte o "incumprimento da Xunta de Galicia coa actuación comprometida para a mellora da estrada PO-840 ao seu paso por Agolada, despois de que rematase o primeiro semestre de 2026 sen que se iniciaran as obras anunciadas pola propia Consellería".
A portavoz municipal do BNG en Agolada, Susana Tato, lembra que "foi a Xunta quen anunciou publicamente que as obras serían adxudicadas e iniciadas durante o primeiro semestre deste ano. Ese prazo xa pasou e, unha vez máis, Agolada segue esperando mentres a estrada continúa deteriorándose".
PUBLICIDADE
Tato critica que "o Goberno galego non pode converter os anuncios en política de infraestruturas. A veciñanza non circula por notas de prensa, circula por unha estrada chea de deficiencias que leva anos precisando unha actuación integral".
A portavoz nacionalista lembra que a PO-840 é unha vía fundamental para Agolada, utilizada diariamente por veciños, transporte escolar, ambulancias, empresas e explotacións agrogandeiras. "Estamos a falar dunha cuestión de seguridade viaria. O mínimo que merece a cidadanía é que a Xunta cumpra coa palabra que deu", afirmou.
Pola súa banda, a deputada do BNG no Parlamento de Galicia, Ariadna Fernández, subliña que "o ocorrido coa PO-840 é un exemplo máis da política de escaparate do Partido Popular: moitos anuncios, moitas promesas e moi poucas obras executadas".
PUBLICIDADE
Fernández lembra que o BNG xa levou esta situación ao Parlamento para reclamar unha actuación urxente na estrada e advertiu de que "o rural non pode seguir sendo tratado como un territorio de segunda. As infraestruturas non poden depender da propaganda nin dos tempos políticos do Goberno galego. Se o Executivo galego anunciou publicamente un prazo para iniciar estas obras e ese prazo xa se incumpriu, ten a obriga de dar explicacións á veciñanza, informar en que situación se atopa o expediente e fixar unha data para o inicio duns traballos imprescindibles para Agolada", declara Ariadna Fernández.
PUBLICIDADE
O BNG reclama á Consellería de Vivenda e Planificación de Infraestruturas que informe con transparencia sobre a situación da actuación e fixe unha data para o inicio das obras, "porque a veciñanza de Agolada leva demasiado tempo agardando por unha estrada digna".
NOTICIAS RELACIONADAS:
O BNG de Agolada esixe o arranxo urxente da N-640 e da PO-840: https://www.ecosdacomarca.com/post/o-bng-de-agolada-esixe-o-arranxo-urxente-da-n-640-e-da-po-840
O BNG insta á Xunta a arranxar o firme da estrada PO-840 ao seu paso polo concello de Agolada: https://www.ecosdacomarca.com/post/o-bng-insta-%C3%A1-xunta-a-arranxar-o-firme-da-estrada-po-840-ao-seu-paso-polo-concello-de-agolada
A Xunta acaba de darlle luz verde á licitación das obras de reforzo do firme da PO-840 en Agolada: https://www.ecosdacomarca.com/post/a-xunta-acaba-de-darlle-luz-verde-%C3%A1-licitaci%C3%B3n-das-obras-de-reforzo-do-firme-da-po-840-en-agolada
Comentarios