O BNG de Agolada esixe a dimisión inmediata do alcalde, Luis Calvo
- ecosdacomarca
- hace 6 horas
- 2 Min. de lectura
Ecos da Comarca/Agolada
O Bloque Nacionalista Galego de Agolada vén de rexistrar no Concello unha moción solicitando "a dimisión inmediata do alcalde, Luis Calvo Miguélez (PAYJ), despois de que o Tribunal Superior de Xustiza de Galicia (TSXG) o condenase por un delito de prevaricación administrativa á pena de nove anos de inhabilitación para emprego ou cargo público e para o exercicio do dereito de sufraxio pasivo".
A sentenza, feita pública o pasado 10 de novembro, confirma, segundo o BNG, "que o rexedor cometeu actuacións arbitrarias e contrarias a dereito na paralización das obras da depuradora de Lácteos Farelo S.L., e obrígao ademais a indemnizar á empresa afectada en preto de 24.800 euros polos danos ocasionados".
Aínda que o fallo non é firme e cabe recurso de casación ante o Tribunal Supremo, o BNG de Agolada considera que a situación "é politicamente insostible". “Non falamos xa de sospeitas, senón dunha condena xudicial firme en dúas instancias que acredita prevaricación. Por decencia democrática, o alcalde debe dimitir e permitir que Agolada recupere credibilidade e estabilidade institucional”, afirmou a portavoz municipal, Susana Tato Pampín.
O grupo nacionalista lembra tamén que o artigo 6.2.b da Lei Orgánica do Réxime Electoral
Xeral (LOREG) establece que os condenados, aínda que a sentenza non sexa firme, por delitos contra a Administración Pública con pena de inhabilitación, son inelexibles para concorrer ás eleccións. “O propio TSXG impón unha inhabilitación para cargo público e para o sufraxio pasivo, o que deixa claro que Luis Calvo non poderá presentarse ás próximas eleccións municipais”, engadiu Tato.
Publicidade
Na moción rexistrada, o BNG solicita:
- A dimisión inmediata de Luis Calvo Miguélez.
- Que o Partido Anticorrupción y Justicia (PAYJ) designe outra persoa para asumir a alcaldía.
- Que se publique o acordo no taboleiro e na sede electrónica do Concello.
- E que se traslade á Xunta Electoral Provincial.
O BNG anuncia que continuará reclamando "unha política limpa, responsable e transparente ao servizo da veciñanza, non dos intereses persoais de quen xa foi condenado por abusar do seu cargo".
NOTICIAS RELACIONADAS:
O alcalde de Agolada sentou hoxe no banco dos acusados por precintar a ampliación da depuradora de Lácteos Farelo: https://www.ecosdacomarca.com/post/o-alcalde-de-agolada-sentou-hoxe-no-banco-dos-acusados-por-precintar-a-ampliaci%C3%B3n-da-depuradora-de-l
Condenan a tres anos e medio de cárcere ao alcalde de Agolada por precintar Lácteos Farelo: https://www.ecosdacomarca.com/post/condenan-a-tres-anos-e-medio-de-c%C3%A1rcere-ao-alcalde-de-agolada-por-precintar-l%C3%A1cteos-farelo
O alcalde de Agolada non entrará en prisión ao quedar absolto do delito de falsedade documental: https://www.ecosdacomarca.com/post/o-alcalde-de-agolada-non-entrar%C3%A1-en-prisi%C3%B3n-ao-quedar-absolto-do-delito-de-falsedade-documental
Comentarios