Concentración en Melide para esixir que se cubran os postos de tres docentes no conservatorio
- ecosdacomarca
- 25 feb
- 2 min de lectura
Ecos da Comarca/Melide
A ANPA Harmonía do Conservatorio Municipal celebrou o pasado luns unha concentración diante do conservatorio de música de Melide para esixir que se cubran os postos de tres docentes.
Manifesto lido durante a concentración:
"Hoxe estamos aquí, diante do Conservatorio Municipal de Música de Melide, non por capricho, nin por confrontación, senón por responsabilidade. Estamos aquí como nais, pais, profesorado, alumnado e veciñanza que defendemos un servizo público esencial para o noso pobo.
Levamos tres cursos sen profesor de guitarra. Este curso, o alumnado quedou tamén sen profesora de canto e sen profesora de acordeón. Hai que recordar que esto afecta, ademais dos matriculados nestes instrumentos, a outras materias impartidas por ditos profesores/as. Cada unha destas especialidades ten a súa casuística, pero as tres teñen en común a falta de solución. Non estamos ante un problema puntual, estamos ante un problema estrutural que se prolonga no tempo e que afecta directamente á formación do noso alumnado.
Publicidade
Cada curso que pasa sen solución é un curso perdido:
Perden as nenas e nenos.
Perden as familias.
Perde Melide.
O conservatorio non é un luxo, é un servizo cultural público que forma, educa, crea comunidade e enriquece a vida cultural do noso concello e da súa contorna. A música educa en disciplina, sensibilidade, esforzo e traballo en equipo. A música abre portas! E o noso alumnado merece as mesmas oportunidades que calquera outro.
Publicidade/DOAZÓN PARA ECOS DA COMARCA
O Concello é o responsable directo da contratación do profesorado, por iso pedimos, con respecto pero con firmeza, que asuma esa responsabilidade e dea unha solución inmediata e estable. Non pedimos privilexios, pedimos dereitos básicos. Pedimos que se garanta a continuidade das ensinanzas. Pedimos estabilidade para o alumnado. Pedimos compromiso real co futuro do conservatorio.
Queremos deixar claro que esta mobilización non responde a ningunha ideoloxía nin partido político. Somos un grupo de nais e pais unidos pola defensa dos intereses dos nosos fillos e fillas. O noso único obxectivo é que o Conservatorio de Melide funcione como merecen os veciños e veciñas de Melide. Porque defender o conservatorio é defender a cultura. Defender a cultura é defender o futuro! Moitas grazas".
NOTICIAS RELACIONADAS:
O PP de Melide denuncia "a neglixente xestión do Conservatorio Municipal": https://www.ecosdacomarca.com/post/o-pp-de-melide-denuncia-a-neglixente-xesti%C3%B3n-do-conservatorio-municipal
ANPA: "A Valedora do Pobo pide de novo ao Concello de Melide o informe sobre o profesor de guitarra": https://www.ecosdacomarca.com/post/anpa-a-valedora-do-pobo-pide-de-novo-ao-concello-de-melide-o-informe-sobre-o-profesor-de-guitarra
Comentarios