Vila de Cruces recibe con esperanza e prudencia o anuncio da reforma do CEIP Nosa Señora da Piedade
Ecos da Comarca/Vila de Cruces
O Concello de Vila de Cruces valora positivamente o anuncio da Xunta de Galicia de reformar o edificio de Primaria do CEIP Plurilingüe Nosa Señora da Piedade, aínda que reclama que o proxecto dea resposta ás necesidades da comunidade educativa e que as obras se materialicen definitivamente.
A vindeira semana, a Consellería de Educación presentará á comunidade educativa deste centro educativo a súa proposta de actuación para mellorar as instalacións do centro. O plan contempla a creación de novas aulas no edificio de Primaria e a posibilidade de desafectar o inmoble de Infantil, que presenta importantes problemas de filtracións de auga e humidades.
Desde o Goberno local consideran que se trata dunha actuación necesaria e urxente, que levan anos reclamando xunto coa ANPA, a comunidade educativa e o BNG. Por iso, agardan que a intervención permita solucionar de maneira efectiva os problemas que presenta o centro.
Con todo, o Concello recibe este novo anuncio con esperanza, pero tamén con prudencia, xa que lembra que antes das pasadas eleccións municipais xa se anunciara a intención de acometer estas melloras, sen que finalmente se chegase a executar ningunha actuación.
PUBLICIDADE
Ademais, o Goberno local lamenta ter coñecido a noticia a través dos medios de comunicación, mentres continúa sen recibir resposta aos numerosos escritos remitidos á Xunta. O último deles, enviado o pasado 9 de outubro, insistía na urxencia e na necesidade de acometer as obras.
Mentres agarda por unha solución definitiva, o Concello continúa asumindo reparacións puntuais na cuberta do edificio, unhas intervencións que, segundo sinala, non resolven os problemas estruturais de fondo. Neste sentido, defende que o centro educativo precisa dunha reforma integral que permita garantir unhas instalacións adecuadas.
PUBLICIDADE
O Concello de Vila de Cruces confía en que esta vez se cumpran os compromisos anunciados e que a reforma do edificio de Primaria se converta, por fin, nunha realidade, en beneficio do alumnado, das familias e de toda a comunidade educativa.
NOTICIAS RELACIONADAS:
O BNG esixe á Xunta e ao Concello solucións inmediatas para o CEIP Nosa Señora da Piedade: https://www.ecosdacomarca.com/post/o-bng-esixe-%C3%A1-xunta-e-ao-concello-soluci%C3%B3ns-inmediatas-para-o-ceip-nosa-se%C3%B1ora-da-piedade
O goberno cruceño sinala que levan anos reclamando unha solución para o CEIP Nosa Señora da Piedade: https://www.ecosdacomarca.com/post/o-goberno-cruce%C3%B1o-sinala-que-levan-anos-reclamando-unha-soluci%C3%B3n-para-o-ceip-nosa-se%C3%B1ora-da-piedade
O BNG urxe á Xunta o proxecto e orzamento para a reforma do CEIP Nosa Señora da Piedade de Cruces: https://www.ecosdacomarca.com/post/o-bng-urxe-%C3%A1-xunta-o-proxecto-e-orzamento-para-a-reforma-do-ceip-nosa-se%C3%B1ora-da-piedade-de-cruces
O BNG lamenta que a Xunta evite o debate sobre a situación do CEIP Nosa Señora da Piedade de Cruces: https://www.ecosdacomarca.com/post/o-bng-lamenta-que-a-xunta-evite-o-debate-sobre-a-situaci%C3%B3n-do-ceip-nosa-se%C3%B1ora-da-piedade-de-cruces
Comentarios