O BNG de Silleda denuncia que as obras da Avenida do Parque seguen sen rematar
Os nacionalistas critican "a permisividade do goberno municipal ante un novo atraso" e
lembran "que o aparcadoiro anunciado na rúa Carballeira do Chousiño continúa sen abrir"
Ecos da Comarca/Silleda
O BNG de Silleda denuncia "un novo incumprimento dos prazos nas obras de mellora da Avenida do Parque. Os traballos comezaron o 17 de novembro de 2025 cun prazo de execución de seis meses e, despois de dúas prórrogas, a última ampliación concedida rematou o pasado 2 de setembro. A finais de outubro, a obra continúa sen finalizar", lamenta o Bloque.
A voceira e candidata do BNG á Alcaldía, Erea Rey, critica a falta de reacción do goberno local. “Déronse dúas prórrogas á empresa e a última rematou hai case dous meses. A obra segue sen concluír e non consta unha nova ampliación do prazo. O goberno debería explicar que medidas adoptou para esixir á empresa que remate dunha vez os traballos”, sinala.
Os nacionalistas lembran que este atraso afecta tamén ao aparcadoiro anunciado polo
Concello en novembro de 2025 na rúa Carballeira do Chousiño. O goberno asegurou daquela que a parcela, empregada durante os traballos para acumular materiais e
restos da obra, se habilitaría como aparcadoiro unha vez finalizase a actuación. “Case un ano despois daquel anuncio, o aparcadoiro segue sen estar a disposición da veciñanza e a parcela continúa ocupada polos restos dunha obra que tampouco dá rematado. É outra promesa que queda pendente mentres o goberno mira para outro lado”, critica Rey.
PUBLICIDADE
Para o BNG, o sucedido na Avenida do Parque volve evidenciar “unha excesiva permisividade do goberno municipal cos atrasos das empresas adxudicatarias”. “Non é a primeira nin a segunda vez que unha obra municipal incumpre os prazos. O Concello ten que controlar os contratos, esixir que se cumpran e defender os intereses da veciñanza”, afirma Rey.
“Case un ano para 200 metros de rúa; dez meses para unha piscina”
Os nacionalistas ironizan tamén coa contradición entre os atrasos na Avenida do Parque e os prazos que o goberno municipal manexou para defender a construción dunha piscina climatizada. “Para reformar apenas 200 metros dunha rúa necesitaban seis meses e xa van
camiño dun ano. Pero, ao mesmo tempo, pretendían convencernos de que podían construír unha piscina climatizada de 3,7 millóns de euros en só dez meses. A comparación fala por si soa e demostra o pouco realistas que eran aqueles prazos”,
ironiza Erea Rey.
PUBLICIDADE
“Se non fose porque estamos falando de cartos públicos e das molestias que leva meses soportando a veciñanza, sería para tomalo a broma”, conclúe.
Comentarios