Ecos da Comarca/Agolada
Veciños de distintas parroquias de Agolada denuncian que, logo de acudir nos últimos meses ao Concello en varias ocasións, non puideron consultar o proxecto de Altri remitido por Augas de Galicia ao consistorio dentro do proceso de información pública, xa que o persoal municipal “nos di sempre que a documentación a ten o secretario do Concello e que non está”. Dende o pasado 19 de decembro de 2023 en que Augas de Galicia remitiu aos concellos afectados este proxecto, foron varios os veciños de Brocos, O Sexo ou A Baíña os que acudiron ao Concello en distintas ocasións e non conseguiron ver o proxecto “porque o concello o ten secuestrado non sabemos con que interese”.
Este venres outro veciño chamou preguntando pola documentación e “comprobamos que
a resposta segue a ser a mesma, que a ten o secretario e que non está”. Legalmente o
Concello está obrigado neste proceso de exposición pública a ter a documentación a dispor de todos os veciños e veciñas que queiran consultala sen autorización previa nin expresa e calquera funcionario está obrigado a facilitar esa información e mesmo a dispor de formularios para que os afectados podan presentar alegacións si o estiman.
Publicidade
En Agolada son 218 as fincas afectadas por este proxecto da canalización de auga que Altri quere sacar do encoro de Portodemouros ata a planta que proxecta construír en Palas de Rei. Unha parte destas fincas poderían ser expropiadas e noutros casos terían enriba unha servidume de ata 10 metros. “Todas estas fincas teñen propietarios, pero non podemos presentar alegacións porque o Concello de Agolada nos está ocultando a información do proxecto”.
O prazo de presentación destas alegacións remata o vindeiro 28 de febreiro, "e o Concello
de Agolada coa súa actitude obstrucionista está a impedir que os veciños e veciñas
exerzamos os nosos dereitos”. O caso é mesmo máis grave, xa que afirman que "algúns veciños das parroquias afectadas recibiron varias visitas do alcalde, Luís Calvo, nos últimos días para dicirlles que o Concello non ten información algunha ao respecto e que non temos nada que facer, que nos van a expropiar xa as fincas”.
Publicidade
"Son moitos os veciños afectados por este proceder “caciquil” do alcalde e o seu equipo de goberno", por iso onte presentaron por escrito unha denuncia diante de Augas de
Galicia e puxeron o asunto en coñecemento deste organismo para que teña en conta “a
necesidade de ampliar o prazo de exposición pública para garantir os dereitos dos veciños e veciñas que non puideron acceder á información que nos garante a lei”.
Publicidade
Ademais os afectados presentaron este venres por rexistro no Concello de Agolada unha queixa diante das reiteradas desculpas do Concello para non ofrecer aos veciños e veciñas unha información que teñen a obriga legal de facilitar. "No consistorio un veciño pediu por terceira vez a documentación, ningún dos traballadores soubo dicirlle onde está o proxecto e xa que logo presentamos un escrito pedindo un certificado ao secretario do
Concello acreditando que non hai exposición pública desta documentación, co cal o
Concello está a incumprir a legalidade vixente anulando os dereitos dos veciños e veciñas".
