Un total de 73 vehículos disputará esta fin de semana a 27ª edición do Rali do Cocido

Serán 11 os tramos aos que se teñan que enfrontar os pilotos nun dos rallies con máis historia da comunidade

Laura Moure/Deza

A 27ª edición do Rali do Cocido servirá para dar o pistoletazo de saída á Copa de España de Rallyes de Asfalto, tamén coñecida como CERA-Recalvi. Os días 21 e 22 de abril as localidades de Lalín, Silleda e Cruces gozarán coa presenza da CERA - Recalvi.

Entre todas as localidades conforman un itinerario de 106,52 quilómetros contra o crono, que sumados aos de enlace, fan que o percorrido total do rally sexa de 357,20 quilómetros. Serán 11 os tramos aos que se teñan que enfrontar os pilotos nesta edición dun dos rallies con máis historia da comunidade.

O itinerario arrincará o venres coa disputa do primeiro cronometrado (nos arredores de Lalín) de 1,5 quilómetros seguido da cerimonia de saída que se disputará na “Praza de Galicia”.

Preme na imaxe se queres contactar connosco!

O sábado dispútase a xornada máis intensa cun itinerario que agrupa 10 tramos en catro bucles diferentes. Silleda-Disiclin e O Couto-Kia Rias Motor conformarán o primeiro deles, que se repetirá tras o primeiro período de asistencia co suplemento do tramo de Saborida-GSI. Despois da asistencia de mediodía volverá facerse o tramo de Saborida-GSI e dispoñeranse a realizar as primeiras pasadas a Vila de Cruces-Staroil e Carballeda-Grupo Montefaro. A xornada acabará coa cerimonia de entrega de trofeos ás 21:15 horas.

Esta edición do Rali do Cocido non só contará cun percorrido espectacular, senón que tamén gozará cunha impresionante lista de rexistrados cun total de 73 vehículos. A lista está encabezada polo Alpine A110 de Jorge Cagiao e con nomes tan relevantes como os de Óscar Palacio, Alvaro Muñiz, Alberto Otero, Albert Orriols ou Felix Macías.

Presentación na Deputación

Cabe mencionar que onte, mércores, o deputado provincial Manuel González presentou a proba acompañado do presidente e o vogal da Escudaría Lalín-Deza, Mateo Varela e David Cerdeira, e outras integrantes da escudaría. O deputado Manuel González lembrou que “esta proba permite gozar do deporte, da natureza e da gastronomía” e salientou “o gran labor que realizou a Escudaría Lalín-Deza durante todo o ano para a promoción do deporte e da provincia de Pontevedra”, así como a “gran repercusión” que acada esta proba. Por estes motivos, “a Deputación de Pontevedra sempre estará ao voso carón”.

O presidente da Escudaría, Mateo Varela, puxo en valor que a Deputación “é unha das maiores benfeitoras desta proba” e destacou novidades como a creación da “Copa Clio Trophy Galicia” ou o “Trofeo Galicia Historic” para coches antigos, cunha grande aceptación e 40 persoas inscritas. Ademais, a partir de agora poderán competir persoas tanto con licenza española como con licenza galega para que “ninguén perda de competir por ter unha licenza ou outra”.

Pola súa banda, o vogal David Cerdeira informou dos cambios que se realizarán nalgúns dos 10 tramos e da recuperación do treito espectáculo no casco urbano de Lalín, e tamén salientou os aproximadamente 360 quilómetros que conforman o Rali do Cocido, dos que 106 serán cronometrados.

NOTICIA RELACIONADA:

• Presentación coa presenza da Xunta, lista de inscritos e acceso á web do rali: https://www.ecosdacomarca.com/post/lete-reivindica-en-lal%C3%ADn-o-peso-do-automobilismo-galego-no-calendario-nacional-con-10-probas