Stop Macrogranxas Agolada supera as 1.000 alegacións contra a macrogranxa de 365.000 galiñas
A plataforma veciñal chama a seguir sumando apoios antes do 10 de novembro para frear unha explotación que consideran incompatible cun rural vivo e habitable
Ecos da Comarca/Agolada
A campaña veciñal contra o proxecto de construción dunha macrogranxa de 365.000 galiñas en Agolada xa supera as 1.000 alegacións, pero a plataforma Stop Macrogranxas Agolada insiste na importancia de seguir sumando apoios ata o peche do
prazo, o vindeiro 10 de novembro.
A plataforma fai un chamamento á participación cidadá e lembra que as alegacións poden
asinarse de maneira moi sinxela, en menos dun minuto, a través da web
www.stopganaderiaindustrial.org. Non é necesario realizar ningún trámite complexo, abonda con acceder á páxina, cubrir os datos solicitados e asinar a alegación.
“Cada sinatura conta. Necesitamos que todas as persoas que consideran que este proxecto non ten cabida no noso territorio dean un paso adiante e nos axuden a sumar máis apoios antes de que remate o prazo“, sinalan desde a plataforma.
PUBLICIDADE
A mobilización responde ao proxecto dunha explotación avícola industrial situada a
aproximadamente un quilómetro do núcleo de Agolada, cunha capacidade para 365.000
galiñas. Segundo a documentación presentada pola empresa promotora, Proteínas y Cereales de Galicia, S.L., a instalación xeraría máis de 20 toneladas diarias de excrementos e consumiría un volume de auga equivalente ao dunha poboación de 1.400 persoas nun territorio declarado en seca pola falta de precipitacións. A plataforma alerta tamén dos posibles efectos sobre os acuíferos, a calidade do aire e a saúde da veciñanza.
Para Stop Macrogranxas Agolada, o que está en xogo vai moito máis alá dunha instalación
concreta: é o modelo de territorio e de desenvolvemento que se quere para o futuro. “Defendemos un rural vivo, con actividade económica, emprego e oportunidades, pero
tamén habitable, no que se poida vivir, traballar e criar as nosas fillas e fillos sen ter que
asumir os impactos ambientais e sanitarios de explotacións destas dimensións”.
PUBLICIDADE
A plataforma insiste en que non se opón á actividade económica nin á gandaría, senón a
proxectos industriais que, pola súa escala e consumo de recursos, consideran
incompatibles coa vida nas aldeas e coa conservación da contorna.
Por iso, anima a toda a cidadanía, tanto de Agolada como doutros lugares, a participar na
campaña. O prazo remata o 10 de novembro e aínda hai tempo para sumar máis
alegacións.
Sinatura de alegacións: https://stopganaderiaindustrial.org/macrogranxa-agolada/
Enlace ao expediente do proxecto (2026-IPPC-I-32):
NOTICIAS RELACIONADAS:
A Xunta tramita o proxecto dunha granxa de 365.500 galiñas poñedoras en Agolada: https://www.ecosdacomarca.com/post/a-xunta-tramita-o-proxecto-dunha-granxa-de-365-500-gali%C3%B1as-po%C3%B1edoras-en-agolada
O Sindicato Labrego Galego alegará contra a macrogranxa de 365.500 galiñas de Agolada: https://www.ecosdacomarca.com/post/o-sindicato-labrego-galego-alegar%C3%A1-contra-a-macrogranxa-de-365-500-gali%C3%B1as-de-agolada
O BNG de Agolada alerta do impacto da explotación de 365.500 galiñas e reclama unha avaliación: https://www.ecosdacomarca.com/post/o-bng-de-agolada-alerta-do-impacto-da-explotaci%C3%B3n-de-365-500-gali%C3%B1as-e-reclama-unha-avaliaci%C3%B3n
Stop Macrogranxas Agolada alerta dos riscos da explotación de 365.400 galiñas:https://www.ecosdacomarca.com/post/stop-macrogranxas-agolada-alerta-dos-riscos-da-explotaci%C3%B3n-de-365-400-gali%C3%B1as
Comentarios