O TSXG acorda a paralización cautelar do proxecto eólico Estivada promovido en Agolada e Antas

O Tribunal galego dá novamente a razón a Adega e "desmonta así os bulos da Xunta e da patronal eólica sobre o desbloqueo do sector"

Ecos da Comarca/Agolada/Antas

O Tribunal Superior de Xustiza de Galiza (TSXG) dá novamente a razón a Adega e acorda a paralización cautelar do proxecto eólico Estivada, promovido por Green Capital Power nos concellos de Agolada e Antas de Ulla. Trátase da terceira paralización cautelar por riscos ambientais adoptada, a instancias de Adega, pola sección 3ª da Sala do Contencioso-Administrativo após o traslado forzoso dos maxistrados Luís Villares e Dolores López á sección 4ª e despois de que a Xunta atribuíse a parálise do sector á súa suposta parcialidade.

A nova composición da sección 3ª acolle de novo unha solicitude de paralización cautelar de Adega (tras as dos proxectos Pena do Pico e Fial das Corzas), ao considerar que no caso do parque eólico Estivada "constan indicios racionais de posíbel dano ambiental no informe técnico achegado pola actora" e que "as afeccións ambientais identificadas abarcan un grave impacto sobre a conectividade ecolóxica e a biodiversidade da zona".

Malia a unha DIA favorábel e aos argumentos achegados polas denunciadas (Xunta e empresa), o Alto Tribunal galego considera que "non logran neutralizar a incerteza sobre o posíbel dano ambiental, polo que, [], o principio de precaución de raigame comunitaria impón priorizar a salvagarda provisional do substrato ecolóxico persistente". Para a Sala, este principio "esixe actuar antes de que unha eventual Sentenza estimatoria quede reducida a papel mollado pola consumación de feitos irreparábeis".

O P.E. Estivada foi autorizado en 2023 no centro xeográfico da Galicia, en concreto, nos concellos de Agolada e Antas de Ulla. Prevé colocar 8 aeroxeradores de 200 metros de altura en montes próximos á Serra do Careón, espazo da Rede Natura e na súa área de ampliación.

 PUBLICIDADE

Preme na imaxe para obter máis información.

"Existen importantes déficits na avaliación dos seus impactos sobre a biota e ignora a presenza de taxóns ameazados como as rapiñas esteparias, nidificantes en zonas próximas. Constitúe tamén unha posíbel fragmentación artificiosa co P.E. "Zamorra" promovido pola mesma empresa e suspendido en 2025 polo TSXG a instancias de Adega. Ambos polígonos eólicos abeiran sospeitosamente dous espazos da RN2000 e as súas áreas de ampliación, e conforman en conxunto unha auténtica barreira para a avifauna entre os dous espazos naturais protexidos", sinala Adega.

"O TSXG desmonta os bulos da Xunta e a patronal eólica sobre o desbloqueo do sector"

Adega recalca que "logo das recentes resolucións do TSXG nas que valida a autorización de diversos parques xudicializados ("Bustelo", "Couto Muíño", "Couto da Mina" e "Treboada") por diversos motivos alleos á cuestión ambiental, Xunta e patronal eólica felicitáronse polo "desbloqueo" do sector. Porén, o agumento central das tres últimas cautelares concedidas a ADEGA para os parques de "Estivada", "Fial das Corzas" e "Pena do Pico" apunta aos graves déficits das autorizacións ambientais concedidas pola Xunta. Agora é de novo a Sección 3ª do TSXG, despois da polémica remuda dos maxistrados Luís Villares e Dolores López sinalados pola Xunta como causantes do "parón eólico", a que coa paralización do P.E "Estivada" volve sinalar a chafalleira tramitación administrativa da Xunta. Fica así demostrado que o actual caos eólico non se debe nin ás decisións xudiciais nin á actuación do ecoloxismo: é froito dunha planificación caduca e da incompetencia dunha administración máis preocupada polos beneficios das eléctricas que polo interese público. E a suposta inseguridade xurídica que a Xunta atribuíu ás decisións xudiciais de paralización de numerosos parques, habería que buscala mellor no caos normativo creado polo PP: a lei eólica vixente (8/2009) aprobada no primeiro ano de Feijóo na Xunta, acumula nesta altura máis modificacións que artigos: foron 105 cambios a través de 14 leis consecutivas".

 PUBLICIDADE

Preme na imaxe para contactar connosco.

Todo un exemplo de "seguridade xurídica", apunta. "Esta nova resolución pon tamén de manifesto a urxente necesidade dunha nova planificación do sector baseada en criterios de sustentabilidade ambiental e xustiza social. Como sinalou a Sala no seu Auto, "o desenvolvemento industrial non está validado legalmente se pode menoscabar elementos do medio ambiente susceptíbeis de protección. Por tanto, ninguna norma autonómica ou estatal [] pode autorizar unha industria se ésta é susceptíbel de menoscabar ou degradar de maneira desprotexida un elemento do ecosistema preexistente. O interés público superior radica en salvagardar a contorna natural"".

Esta nova vitoria nos tribunais, salienta Adega, "foi posíbel grazas ás achegas da veciñanza e de persoas comprometidas co medio ambiente a través da campaña de micromecenado #TiPodesParalos, pola que se conseguiu reunir os fondos necesarios para afrontar os custos deste proceso xudicial. A todas, moitas grazas!".