O IES de Palas acolleu a presentación do xogo de mesa Saint Jacques, baseado no Camiño Francés

O Castelo de Pambre ou a Igrexa de Vilar de Donas aparecen recollidos no mesmo

Laura Moure/Palas de Rei

O IES do Camiño de Palas de Rei acolleu onte a presentación do xogo de mesa Saint Jacques, baseado no Camiño Francés. O proxecto contou co apoio da Xunta a través do programa O Teu Xacobeo.

Trátase dun pasatempo inspirado no tradicional Xogo da Oca, que inclúe divulgación, cultura e entretemento. Está pensado para entre dous e seis xogadores a partir dos 16 anos, que teñen que responder a diferentes preguntas para avanzar por un taboleiro de 90 casas. En total contén 4.500 cuestións repartidas en cinco bloques temáticos  - Camiño de Santiago, cultura xeral, ciencia, cine e espectáculos e deportes –.

As preguntas das cartas do xogo suman un total de 4.500 e divídense en diferentes materias (Camiño de Santiago; cine e espectáculos; deportes e entretemento; cultura xeral e ciencia, tecnoloxía e natureza) con diferentes grados de dificultade.

 PUBLICIDADE

Preme na imaxe para obter máis información.

Intentouse retratar no taboleiro deste entretemento aqueles lugares do Camiño Francés máis relevantes para cada municipio, o que, ademais de poner en valor estes lugares, fomenta o seu coñecemento, así por exemplo, en Palas de Rei o Castelo de Pambre ou a Igrexa de Vilar de Donas aparecen recollidos no xogo.

O director territorial da Consellería de Cultura, Lingua e Xuventude, Manuel Antonio Fernández, asistiu á presentación, na que alumnos e alumnas do instituto palense tiveron ocasión de probar o xogo.

 PUBLICIDADE

Preme na imaxe para contactar connosco.

O proxecto está promovido por Brinco Soluciones Integrales, que nos vindeiros días  achegará a proposta a outros puntos do Camiño Francés. Así, teñen previsto organizar actividades na Casas do Maior de Portomarín e Triacastela.

A Axencia de Turismo de Galicia ten aberto un novo prazo de presentación de solicitude de axudas do programa O Teu Xacobeo para desenvolver accións na anualidade de 2027. O obxectivo é implicar a toda da sociedade —empresas, entidades e cidadanía en xeral— na celebración e deseño de eventos enmarcados no vindeiro Ano Santo. As peticións poden presentarse ata o 31 de outubro.