O PSOE de Lalín alerta "do perigo das pedras instaladas a modo de bolardo na rúa Monte Faro"

Ecos da Comarca/Lalín

O portavoz do Grupo Socialista no Concello de Lalín, Anxo Álvarez, vén de denunciar publicamente a situación de perigo xerada polas pedras instaladas a modo de bolardo na rúa Monte Faro, que está a causar danos crecentes aos vehículos e poñer en risco a seguridade viaria.

Este coche picou as dúas rodas.

“Son bloques de pedra con arestas agudas: unha simple rozadura está a provocar pinchazos, roturas de pneumáticos, arañazos nas llantas e golpes nas portas. Isto é inaceptable nunha rúa de plataforma única, onde a prioridade debe ser sempre dos peóns, non dos coches”, subliñou Álvarez.

O concelleiro socialista lembra que as rúas de plataforma única teñen vocación peonil, coas beirarrúas ao mesmo nivel que a calzada para facilitar o tránsito das persoas. "Con todo, os bolardos de pedra –lonxe de protexer aos viandantes– manteñen a percepción de dominio do espazo polo tráfico rodado e supoñen un obstáculo para os veciños e un risco para os seus vehículos".

Publicidade

Preme na imaxe para obter máis información do evento.

“Esiximos ao goberno local do PP que retire de forma inmediata estes elementos. Non basta con sinalizar: hai que eliminar o perigo máis aillado”, afirma Álvarez.

Segundo informan residentes da zona, as denuncias de veciños e veciñas acumuláronse nas últimas semanas. Hai persoas que estudan iniciar unha recollida de firmas para reclamar a solución deste problema. O PSOE de Lalín está xa en contacto cos promotores da iniciativa e ofrecerá todo o seu apoio para levar adiante esta acción cidadá.

Publicidade

Preme na imaxe se queres contactar connosco.

“É unha demanda xusta: un espazo público deseñado para as persoas non pode converterse nunha trampa para os seus propios vehículos. Traballaremos da man dos veciños para que o goberno municipal entenda que a seguridade e o benestar da poboación non se negocian”, engadiu o portavoz socialista.