O PP pide a comparencia do alcalde e do edil de Obras de Cruces por "supostas irregularidades"

Ecos da Comarca/Vila de Cruces

O Grupo Municipal do Partido Popular no Concello de Vila de Cruces presentou unha solicitude formal para a convocatoria dun pleno extraordinario, co obxectivo de abordar dous asuntos de especial relevancia para o municipio: a modificación da ordenanza do Imposto de Bens Inmobles (IBI) para introducir bonificacións sociais e ambientais, e a comparecencia do alcalde e do concelleiro de obras pola "detección de múltiples irregularidades en expedientes municipais de obras".

O Partido Popular de Vila de Cruces propón dúas bonificacións potestativas o imposto de bens inmobles:

1. Unha bonificación do 90% no IBI para terreos en núcleos rurais que non poden ser edificados por incumprimento de normativas sectoriais, incumprimento dos parámetros urbanísticos ou a imposibilidade de dispoñer de servizos básicos como auga, electricidade ou saneamento.

2. Unha bonificación do 50% no IBI para vivendas e locais que instalen sistemas de enerxía solar para autoconsumo.

"Estas medidas pretenden corrixir a desigualdade fiscal no rural, promover o desenvolvemento sustentable e apoiar ás familias e propietarios que apostan pola eficiencia enerxética. Este Grupo Municipal do Partido Popular, solicita tamén explicacións urxentes ante os indicios de mala xestión e posíbeis ilegalidades en múltiples contratos de obra pública, entre eles:

1. Reparación da ponte en Liñares (Expediente 570/2020): Obra executada sen autorizacións sectoriais, certificacións falsas e pagamento por elementos non executados.

2. Melloras nas Insuas de Gres (Expedientes 282/2023 e 635/2023):

Diferencias de prezos e calidades sen xustificación técnica.

3. Depuradora no Polígono do Camballón (Expedientes 576/2023 e 167/2024): Cambio de localización a parcela con uso prohibido, execución en terreos privados e obra incompleta recepcionada como finalizada.

Publicidade

Preme na imaxe se queres contactar connosco.

4. Instalación dun ascensor no Auditorio Bernardo G. del Río

(Expediente 577/2023): Ascensor recepcionado sen estar operativo nin conectado á rede eléctrica.

5. Gastos en publicidade: Máis de 170.000 euros en tres anos, 135 facturas a un conglomerado empresarial vencellado ao asesor de comunicación do goberno local, con indicios de sobrecuste e contratación opaca".

O grupo popular demanda que o alcalde Luis Celso Taboada Sánchez e o concelleiro Juan Carlos Rodríguez Martínez comparezan para dar explicacións claras e transparentes ante o pleno e a veciñanza. "Os veciños e veciñas teñen dereito a saber como se están a gastar os recursos públicos e por que se están recepcionando obras que non están rematadas e se pagan partidas que non se executaron. A transparencia non é unha opción, é unha obriga. ”