" O PP impide o debate europeo sobre Altri e a manipulación informativa na TVG", sinala Casares

O eurodeputado socialista acusa aos populares de “agochar temas incómodos e de aliarse coa extrema dereita para silenciar á cidadanía galega en Europa"

Ecos da Comarca/Xeral

O eurodeputado socialista lalinense Nicolás González Casares criticou con firmeza a decisión do Partido Popular Europeo, en alianza coa extrema dereita, de bloquear no Parlamento Europeo o debate sobre dous asuntos de enorme relevancia para Galicia: o proxecto industrial de Altri en Palas de Rei e a situación de manipulación informativa na Televisión de Galicia (TVG).

Durante a sesión da Comisión de Peticións, os votos conservadores impediron que se tratasen dúas peticións presentadas por cidadáns galegos, a pesar de contar cos informes técnicos favorábeis e cumprir cos requisitos regulamentarios. Para González Casares, esta decisión responde a unha estratexia deliberada de censura: “O Partido Popular, en lugar de defender os intereses de Galicia, prefire tapar a boca da cidadanía e agochar temas incómodos, tanto sobre un proxecto industrial cheo de sombras como sobre unha televisión pública cada vez máis afastada do pluralismo e da liberdade de información”.

A petición sobre o proxecto de Altri foi defendida por Marta Gontá, voceira da Plataforma Ulloa Viva, que trasladou á Eurocámara a preocupación social xerada por unha iniciativa que, segundo explicou, “terá un impacto negativo na calidade de vida das comarcas de Ulloa, Terra de Melide e Deza”. E, pola súa banda, no caso da Televisión de Galicia, foi Santiago Alvite, presidente do Comité Intercentros da CRTVG, quen denunciou ante a Comisión a degradación progresiva do ente público. Alvite alertou de que “os servizos informativos designados pola súa dirección incumpren sistematicamente a obrigación legal de garantir a obxectividade, veracidade e pluralismo da información” e denuncia que o Goberno galego incumpre a Directiva 2010/13/UE (Directiva de Servizos de Medios Audiovisuais) ao non asegurar que os organismos reguladores actúen con imparcialidade e transparencia.

Publicidade

Preme na imaxe se quere contactar connosco.

González Casares cualificou de “indignante” que estas dúas peticións fosen silenciadas pola dereita europea. “O que aconteceu é moi grave. O PP non só ignora as preocupacións dos galegos e galegas, senón que se suma á extrema dereita para silenciar debates democráticos que deben producirse nas institucións europeas”, afirmou.

O eurodeputado advertiu que esta actitude “amosa unha deriva autoritaria moi preocupante” e apelou ao respecto institucional que merece Galicia. “A democracia tamén se defende permitindo o debate. Galicia merece transparencia, pluralismo e participación, non opacidade, manipulación e censura. E Europa ten a obriga de escoitar á súa cidadanía, tamén á galega”, concluíu.