O lalinense José Ramón Riádigos logra dúas pratas na Copa Nacional de Culturismo

Quedou subcampión na categoría Culturismo senior -70kg e tamén na categoría Classic Phisique

Laura Moure/Lalín

Boas novas de novo para o lalinense José Ramón Riádigos. Este sábado participou en Madrid na Copa Nacional de Culturismo, onde había uns 190 inscritos, e volveu á casa con dous pedazos premios. Logrou dúas pratas: unha na categoría Culturismo senior -70kg e outra, na categoría Classic Phisique.

"O día de onte foi espectacular. Unha vez máis estou sorprendido co resultado. O certo é que sempre intento aspirar a estar aí arriba porque me gusta loitar e son moi competitivo, pero tamén son consciente das dificultades que hoxe en día hai nos campionatos. Ademais, esta era unha federación nova, polo que ías a cegas respecto a como se desenvolvía, os competidores, o nivel... Pero foi xenial! Unha organización impecable, a xente marabillosa e ao final conseguín dúas pratas", apunta o lalinense.

Ademais, confesa que na categoría Classic Phisique "foi moi dura, quizais a máis de todo o campionato. Houbo que loitar a morte e aí estiven rozando o primeiro posto. E estou moi contento".

Agora xa ten a mirada nun novo reto. "Imos afrontar estas dúas últimas semanas para acabar a tempada no Campionato Internacional en Valencia e aí daremos por finalizada esta primeira tempada. Hai que volver a poñerse as pilas dende mañá, luns, e imos a intentar dalo todo e a desfrutar tamén porque para min este campionato nacional foi o primeiro que fixen, porque sempre disputei galegos, e agora ir a un internacional xa é moi grande para min. É un soño incrible!", subliña.

Cabe mencionar que no mes de maio publicamos unha entrevista que lle fixemos a este veciño de Lalín (pode lerse nos enlaces da parte de abaixo) porque volveu á competición despois de detectarlle unha patoloxía cardíaca grave. Como el mesmo confesaba, nunca pensou poder subirse a unha tarima e isto para el foi cumprir un soño. Pero foi máis alá, xa que ademais dos bos resultados desta fin de semana, o pasado 30 de abril quedou subcampión de Culturismo no Campionato Galego de Culturismo 2022 que se celebrou en Vilalba (Lugo).

Parabéns dende o equipo de ECOS DA COMARCA!!

NOTICIAS RELACIONADAS:

• https://www.ecosdacomarca.com/post/o-lalinense-jos%C3%A9-ram%C3%B3n-ri%C3%A1digos-subcampi%C3%B3n-de-culturismo

• https://www.ecosdacomarca.com/post/un-lalinense-que-volve-ao-culturismo-tras-ser-exemplo-de-superaci%C3%B3n

• https://www.ecosdacomarca.com/post/fomentar-a-actividade-f%C3%ADsica-implica-sa%C3%BAde-e-ante-a-covid-%C3%A9-un-factor-moi-importante-estar-ben