O goberno de Silleda acusa ao BNG "de manipular e mentir sobre a reforma da Avenida do Parque"

A Xunta colabora con este Concello nas obras de mellora desta avenida

Ecos da Comarca/Silleda

O Goberno municipal de Silleda lamenta profundamente a campaña "de manipulación emprendida polo BNG en relación coa reforma da Avenida do Parque, na que se están a verter afirmacións falsas e alarmistas, sen respecto pola verdade nin polo traballo técnico que avala esta actuación".

O BNG acusa o Concello de eliminar árbores “por capricho”, "ocultando á veciñanza un feito que coñecen perfectamente, pois lles foi trasladado de forma directa: os 12 exemplares de Acacia (Acacia Melanoxylon) que se retirarán están afectados por un fungo patóxeno da madeira (Fomitoporia mediterranea), o mesmo que obrigou a principios de ano á tala dos árbores da zona infantil do parque da Igrexa", indica o goberno local.

Explica que a presenza de Fomitoporia mediterranea foi advertida pola Estación Fitopatolóxica do Areeiro, organismo de referencia dependente da Deputación de Pontevedra, cando se fixo o informe das árbores do parque da iglesia. "Trátase dun fungo patóxeno da madeira que provoca podremia branca no interior do tronco e das pólas principais, debilitando de forma irreversible a estrutura do árbores. A infección non presenta síntomas externos evidentes ata fases moi avanzadas, polo que o risco de colapso é imprevisible".

Non existe ningún tratamento curativo eficaz, apunta, contra este fungo nin técnica que permita recuperar a madeira afectada, "e manter os exemplares suporía unha grave irresponsabilidade en termos de seguridade cidadá, especialmente nun espazo público

con tránsito peonil como é a Avenida do Parque". “Ignorar este risco sería unha grave

irresponsabilidade”, sinala a rexedora

Sobre a falta de transparencia que denuncia o BNG, "é necesario recordar que dende a presentación pública do proxecto, o Goberno local explicou a situación dos árbores, e os motivos que fan necesaria a súa substitución, tanto por razóns de seguridade como de viabilidade técnica, xa que ademais do risco fitosanitario, o sistema radicular destes exemplares está deteriorando gravemente o firme da avenida, e calquera reforma que

non actúe sobre esta cuestión estaría condenada ao fracaso".

“Se quixeramos manter os árbores, teriamos que cortar unha parte importante das raíces, debilitándoos aínda máis. Tan só é necesario comprobar o estado actual do pavimento da zona dos taxis para entender o alcance do problema”, explica a alcaldesa.

Publicidade

Preme na imaxe para obter máis información.

Ademais, apuntan "é rotundamente falso que se vaian substituír estes árbores por outros de pequeno porte. O orzamento do proxecto contempla a plantación de 16 novos árbores de 35 cm. de perímetro, tanto na zona afectada como no resto da avenida, cuxa especie será definida na fase de execución pola dirección facultativa. A maiores, o Concello incorpora como mellora no contrato a plantación de 10 exemplares adicionais de 40 cm. de perímetro, que se executarán sempre que as empresas licitadoras os oferten".

O proxecto tamén prevé, subliña, o transplante dos exemplares sans que se vexan afectados polos novos trazado das obras, seguindo a mesma liña que se aplicou noutras actuacións, como a da Avenida Arturo Pérez Lázara ou a plaza Juan Salgueiro na Bandeira, onde todos os árbores retirados foron reubicados noutras zonas. “Esta práctica aplicámola en todas as obras, por respecto ao noso patrimonio natural”, subliña a alcaldesa.

"Resulta, por tanto, inadmisible que o BNG manipule a información, malia coñecer os detalles do proxecto. Expliqueillo persoalmente e teñen acceso a todo o proxecto. Aínda así, utilizan imaxes de árbores pequenos que nin forman nin formarán parte do proxecto, coa única intención de crear confusión e rexeitamento social”, denuncia a alcaldesa.

O Goberno municipal reafirma o seu compromiso coa protección e coidado dos espazos verdes urbanos, sempre desde a responsabilidade, o rigor técnico e a prioridade pola seguridade da veciñanza. E rexeita con contundencia "calquera campaña baseada na mentira e no bulo como ferramenta política. Cortamos por este fungo as árbores do parque evitando así un perigo para os mais pequenos, e curiosamente non houbo ningunha campaña dos nacionalistas. Agora, polo mesmo motivo, queren facer política. Gústalles máis un titular que a seguridade da xente”, afirma a alcaldesa Paula Fernández Pena.

Publicidade

Preme na imaxe para obter máis información do evento.

O que dixo o BNG: https://www.ecosdacomarca.com/post/o-bng-de-silleda-inicia-unha-campa%C3%B1a-para-frear-a-tala-de-%C3%A1rbores-na-avenida-do-parque

Visita da conselleira de Vivenda e Planificación de Infraestruturas

Por outra banda, a conselleira de Vivenda e Planificación de Infraestruturas, María Martínez Allegue, xunto á directora xeral de Urbanismo, Encarnación Rivas, asinou onte coa alcaldesa de Silleda, Paula Fernández, o convenio de colaboración para a execución das obras de mellora da mobilidade peonil na avenida do Parque deste municipio. De acordo a este acordo, a Xunta financiará con case 105.000€ esta actuación, cuxo investimento total se eleva a preto de 750.000€.

A intervención permitirá a transformación integral da contorna da avenida do Parque, coa modernización das infraestruturas, a creación de novos espazos públicos accesibles e a mellora da eficiencia dos servizos urbanos.

O Goberno galego contribuirá á financiación da actuación coa achega do 14% do orzamento, preto de 105.000€, mentres que e o Concello de Silleda aportará o 6% do investimento total previsto e a Deputación de Pontevedra achegará preto de 598.000€, equivalente ao 80% do investimento previsto.

A conselleira destacou este convenio como “exemplo de colaboración entre administracións” e lembrou que a Xunta está a apoiar actuacións como a prevista en Silleda “que contribúan a recuperar espazos públicos dos nosos concellos para transformar o territorio, na procura dun urbanismo sostible e responsable”. Allegue subliñou neste senso o proxecto a desenvolver na avenida do Parque, que permitirá humanizar espazos, mellorar a accesibilidade e acadar espazos máis seguros para a veciñanza, para a revitalización da contorna.

A intervención

A avenida do Parque é unha das principais arterias do casco urbano de Silleda e vertebra a mobilidade entre espazos clave do municipio, como a área comercial e hostaleira do centro urbano, xeradora de actividade económica e social, e diversas zonas residenciais e equipamentos públicos fundamentais, incluíndo o parque central, a igrexa parroquial e diferentes espazos culturais. Coa actuación prevista, mellorarase a accesibilidade, seguridade viaria e adecuaranse os servizos públicos.

O proxecto integra unha serie de intervencións, entre elas a humanización e mellora da accesibilidade; a modernización de infraestruturas subterráneas, incluíndo o soterramento do cableado eléctrico e de telecomunicacións, a renovación da rede de iluminación pública con luminarias LED; a creación dunha zona verde; a renovación da pavimentación con pedra natural ou a ampliación dos servizos culturais, coa apertura da igrexa parroquial cara á Rúa Santa Olaia, xerando un espazo aberto con escalinatas tipo auditorio para eventos culturais ao aire libre.

O proxecto enmárcase dentro das políticas municipais de transformación urbana sostible e accesible, aliñándose co Plan de Mobilidade Urbana Sostible (PMUS) de Silleda, co Plan de Acción para a Axenda 2030 e co programa Cinto Verde, unha estratexia municipal que busca conectar todo o casco urbano a través de rúas humanizadas, accesibles e sostibles.