O BNG de Silleda inicia unha campaña para frear a tala de árbores na Avenida do Parque

Ecos da Comarca/Silleda

O Bloque Nacionalista Galego (BNG) de Silleda vén de poñer en marcha unha campaña nas redes sociais para reclamar ao goberno municipal a modificación do proxecto de reforma da Avenida do Parque, "que contempla a tala de 12 árbores de gran porte que actualmente ofrecen sombra e frescor ás veciñas e veciños da vila".

A campaña arrancou coa publicación dun vídeo nas redes sociais do BNG, no que se alerta sobre o impacto ambiental e económico desta decisión. A portavoz do grupo municipal, Erea Rey, solicita ao goberno local que reconsidere a tala, argumentando que “non ten ningún sentido, nin ambiental nin económico, eliminar árbores que xa existen para plantar outras novas”.

Desde o BNG sublíñase a importancia de protexer as árbores de gran porte nos espazos

urbanos, xa que contribúen a mitigar as illas de calor, melloran a calidade do aire e permiten o goce das rúas mesmo nos meses máis calorosos. A eliminación destas árbores suporía un retroceso na loita contra o cambio climático e na mellora do benestar cidadán.

Publicidade

Preme na imaxe para obter máis información.

Ademais, o grupo nacionalista denuncia "o despilfarro económico que implica esta actuación". "Segundo os datos dispoñibles, o custo da tala ascende a 1.000 euros, aos que hai que engadir 17.000 euros para a compra de árbores de baixo porte e incluso outros 10.000 euros para árbores de gran porte". “É incomprensible gastar máis de 28.000 euros en eliminar árbores vivas e consolidadas para substituílas por exemplares novas que tardarán anos en ofrecer os mesmos beneficios”, sinalan desde o BNG.

Erea Rey lembra que estas son as últimos árbores de gran porte que se poden ver no centro da vila, e fai un chamamento á cidadanía de Silleda para que se sume á campaña "e evite que se repita unha escena como a tala da carballeira da Praza da Feira Vella, que en nome dun falso progreso deixou ao pobo sen un dos seus espazos máis emblemáticos".

Publicidade

Preme na imaxe para obter máis información do evento.

O BNG reafirma o seu compromiso coa defensa do patrimonio natural e urbano de Silleda, e esixe ao goberno municipal que escoite á cidadanía e revise canto antes o proxecto de reforma da Avenida do Parque.