Vila alega ante a Valedora do Pobo para solicitar a reapertura do expediente da residencia de Dozón

Ecos da Comarca/Dozón

O conflito pola xestión e o acceso á nova Residencia e Centro de Día de Dozón suma un novo capítulo. Tras as explicacións remitidas polo alcalde de Dozón, Adolfo Campos Vázquez, á Valedora do Pobo, o veciño promotor da queixa, Mario Vila López, interpuxo un recurso de alegacións solicitando formalmente a reapertura do expediente G.6.Q/2465/26.

Vila sinala que o escrito de alegacións d"esmonta punto por punto a argumentación do rexedor e pon o foco na falta de garantías reais para a poboación local".

Explica que :

1. A «vinculación» no regulamento non garante prazas municipais: "Fronte á afirmación do Concello de que os regulamentos de acceso inclúen a «vinculación co municipio», o recurso aclara que dita cláusula é un mero baremo de puntuación, pero non establece ningunha cota ou porcentaxe de reserva de prazas. Ao tratarse dunha concesión de obra pública a unha empresa privada, esta rexerase por criterios económicos sen que o Prego de Cláusulas Administrativas a obrigue a reservar prazas para as persoas empadroadas".

 PUBLICIDADE

Preme na imaxe para obter máis información do evento.

2. Sen protección para as pensións agrarias: "O recurso denuncia que o Concello non acreditou a existencia de ningún convenio social nin de ningunha Ordenanza Fiscal de Prezos Públicos Bonificados. Isto fai que un equipamento construído en solo municipal e financiado con fondos europeos NextGenerationEU (PRTR) sexa inaccesible para os veciños con menores recursos económicos e pensións agrarias mínimas".

3. Falta de transparencia real no rural: "Fronte á xustificación municipal de ter publicado os anuncios no Diario Oficial da Unión Europea (DOUE) e no Boletín Oficial da Provincia o 27 de decembro de 2024, alegase que dita tramitación en plenas festas de Nadal cumpre a burocracia formal pero vulnera o principio de transparencia proactiva nun concello rural de menos de 1.000 habitantes".

 PUBLICIDADE

Preme na imaxe para contactar connosco.

4. Defensa dos dereitos cívicos: "Respóndese tamén ás descualificacións persoais do alcalde lembrando que o artigo 13 da Lei do Valedor do Pobo recoñece a calquera cidadán o dereito e a lexitimación para defender o interese público e o correcto uso do patrimonio municipal".

Solicitudes á Valedora do Pobo

No recurso dirixido á Valedora do Pobo, María Dolores Fernández Galiño, solicítase a

reapertura das investigacións e a emisión duna Recomendación formal ao Concello de

Dozón para que:

•  Asine un convenio anexo social que garanta unha reserva efectiva e cuantitativa de prazas para residentes.

•  Estableza unha Ordenanza Reguladora de Prezos Públicos Bonificados.

• Mellore os mecanismos de información e difusión pública no municipio.