O goberno de Melide xunto ao PSOE piden que se modifique o proxecto da igrexa de San Pedro
- ecosdacomarca
- hace 5 minutos
- 3 Min. de lectura
Os tres voceiros municipais comparten totalmente o criterio do Museo da Terra de Melide que xa ten manifestado estes días
Ecos da Comarca/Melide
Este martes, o goberno municipal de Melide (AM e BNG), xunto ao PSdG- PSOE, rexistraron unha moción que será tratada no vindeiro pleno a celebrar a comezos de outubro relativa ás intervencións previstas por parte da Xunta de Galiza na igrexa parroquial da vila. As tres formacións políticas comparten a preocupación por varios aspectos recollidos no proxecto “Obra de restauración da igrexa de San Pedro, convento do Sancti Spiritus, Melide (A Coruña), cofinanciado pola Unión Europea nun 60 % do gasto elexible, no marco do Programa Galicia Feder 2021-2027”.
Ana Mosteiro (BNG), Xosé Igrexas (AM) e Mónica Barral (PSdG-PSOE) coinciden en valorar de xeito positivo a actuación prevista sobre a estrutura e humidades que veñen de vello na igrexa, pero non apoian os traballos de revocado das paredes exteriores da igrexa e posterior caleado de branco porque entenden que iso provocaría un desafortunado impacto visual na contorna da Praza do Convento que acolle un importante patrimonio histórico-artístico que se vería moi afectado.
Os tres voceiros municipais comparten totalmente o criterio do Museo da Terra de Melide que xa ten manifestado estes días: “Resulta totalmente incoherente co discurso histórico e coa tendenza da fábrica desta edificación, porque segundo a documentación NON CONSTA que tivera recebo en ningún momento. O recebo de tamaña superficie provocaría, de igual xeito, un necesario mantemento da mesma: repintado, problemas de desconchados, liques e manchóns provocados polas inclemencias meteorolóxicas, que non queda claro neste proxecto, quen sería o encargado de manter e custear, provocando así, que a fachada luza descoidada e sucia”.
PUBLICIDADE
Consideran, tal e como se recolle no texto da moción, que é o intre de sumar esforzos e iniciar cantas accións sexan necesarias por parte das diferentes formacións políticas con representación no Concello de Melide para conseguir que a Xunta de Galicia escoite, recapacite e modifique o proxecto..
O vindeiro Pleno do Concello de Melide deberá votar e adoptar dos seguintes ACORDOS recollidos na moción:
1. Apoiar, valorar e agradecer as obras de restauración promovidas pola Consellaría de Cultura para corrixir as deficiencias estruturais e de humidades que padece o inmoble dende hai moito tempo.
2. Instar á Consellaría de Cultura á modificación do proxecto para suprimir do mesmo as obras de revocado e posterior branqueado das paredes exteriores do Convento de Sancti Spiritus, destinando o importe resultante a outras intervencións de restauración na Igrexa.
PUBLICIDADE
A voceira do BNG, Ana Mosteiro, mantivo o pasado venres unha xuntanza no Museo da Terra de Melide á que tamén acudiu a parlamentaria do BNG, Iria Carreira. A deputada nacionalista comprometeuse a levar este tema ao Parlamento Galego coa máxima urxencia posto que o inicio das obras na igrexa parroquial semella inminente. Ana Mosteiro agarda “que impere o sentido común e o PP de Melide apoie tamén esta moción no vindeiro pleno. Sería importante e desexable que fose aprobada por unanimidade”.
NOTICIAS RELACIONADAS:
López Campos anuncia o inicio en outubro das actuacións na igrexa de San Pedro de Melide: https://www.ecosdacomarca.com/post/l%C3%B3pez-campos-anuncia-o-inicio-en-outubro-das-actuaci%C3%B3ns-na-igrexa-de-san-pedro-de-melide
O Museo da Terra de Melide demanda a modificación do proxecto de restauración da igrexa de San Pedro: https://www.ecosdacomarca.com/post/o-museo-da-terra-de-melide-demanda-a-modificaci%C3%B3n-do-proxecto-de-restauraci%C3%B3n-da-igrexa-de-san-pedro
Comentarios