O xogador do Real Madrid participará no descubrimento da placa co seu nome, co que se rebautizará o estadio de Outeiriño
Laura Moure/Silleda
O Concello de Silleda rendirá homenaxe a vindeira semana ao xogador de fútbol José Luis Mato, máis coñecido como Joselu, que se atopa estes días no municipio descansando xunto á súa familia e amigos.
A cita será o vindeiro martes día 27 e comezará ás 12:00 horas cunha recepción na Casa do Concello por parte da Corporación e directivas de todos os clubes de fútbol do municipio, que tamén participan na homenaxe.
Joselu asinará no Libro de Honra do Concello de Silleda e os actos trasladaranse despois ata o campo municipal de Outeiriño, que dende o martes levará o nome do xogador, que vén de fichar polo Real Madrid e de facer un extraordinario papel ca Selección Española, que o pasado domingo se proclamaba Campiona da UEFA Nations League.
O estadio de Outeiriño pasará a levar pois o nome de Joselu Mato, dando cumprimento así ao acordo plenario do pasado mes de marzo.
O acto está aberto ao público. “É para toda a veciñanza de Silleda un motivo de orgullo que Joselu, un rapaz de Silleda, leve o nome do noso pobo por todo o mundo, despois de lograr grandes fitos, como participar nas tres ligas de Europa, e por suposto do brillante papel que tivo ca Selección, con goles decisivos para ese merecido título final”, engade o alcalde, Manuel Cuiña, que agradece así mesmo a colaboración dos clubs nos actos do vindeiro martes.
NOTICIAS RELACIONADAS:
Convocado pola Selección Española: https://www.ecosdacomarca.com/post/o-futbolista-silledense-joselu-convocado-de-novo-pola-selecci%C3%B3n-espa%C3%B1ola
Fixo historia no partido contra Noruega: https://www.ecosdacomarca.com/post/o-silledense-joselu-marca-nun-minuto-dous-goles-que-lle-dan-a-vitoria-a-espa%C3%B1a-fronte-ao-noruega
Anuncio da cesión ao Real Madrid: https://www.ecosdacomarca.com/post/o-real-madrid-xa-est%C3%A1-moi-preto-de-pechar-a-cesi%C3%B3n-do-xogador-silledense-joselu
Fixache polo Real Madrid: https://www.ecosdacomarca.com/post/o-silledense-joselu-novo-xogador-do-real-madrid
Comments