O Colexio de Xornalistas lamenta profundamente o falecemento do lalinense Xavier Navaza

Ecos da Comarca/Lalín

A Xunta de Goberno do Colexio de Xornalistas de Galicia, en nome de toda a profesión, quere expresar o seu pesar polo falecemento este luns, 9 de setembro, de Xavier Navaza Blanco, e traslada as súas condolencias á familia e persoas achegadas. Navaza, de 76 anos, foi colexiado até o momento da súa xubilación.

Xavier Navaza Blanco naceu en Lalín en 1948 e tras estudar Enxeñería Técnica Naval comezou a traballar a comezos dos 70 no xornal Tele/Exprés de Barcelona, o que o levaría a licenciarse en Ciencias da Información na Universidade Autónoma en 1976. Naquela altura, realizou reportaxes para algunhas das revistas máis influíntes da Transición, como Interviú, La Calle e Actual. De regreso a Galicia, foi cofundador da revista Teima e correspondente de El Periodico de Catalunya, Pueblo e Informaciones. En 1979 foi nomeado xefe do gabinete de prensa da Xunta de Galicia, posto no que perteneceu ata 1990. Posteriormente foi subdirector de Xornal Diario de Pontevedra (1991) e puxo en marcha distintos programas na CRTVG, como Etcétera. A última etapa da súa vida laboral estivo vinculada especialmente ao xornal compostelán El Correo Gallego.

Publicidade

Preme na imaxe para obter máis información.

Os servizos funerarios de Xavier Navaza Blanco están a realizarse nos Velatorios de Lalín (Avenida Buenos Aires, 26), desde onde as 18:00 horas deste martes sairá o cortexo fúnebre cara a Igrexa de Santa María das Dores de Lalín, onde se celebrará o funeral. O finado será incinerado na intimidade familiar. 

A Xunta de Goberno do Colexio Profesional de Xornalistas de Galicia quere expresar o seu fondo pesar polo falecemento deste compañeiro e trasladar o cariño de toda a profesión á súa familia e persoas achegadas.

Publicidade

Preme na imaxe se queres contactar connosco.

Dende o equipo de ECOS DA COMARCA: O noso máis séntido pésame aos seus seres queridos. D.E.P.