O BNG de Silleda denuncia as continuas verteduras ao ría Deza e reclama medidas urxentes

Ecos da Comarca/Silleda

O BNG de Silleda denuncia as continuas verteduras incontroladas ao río Deza. Así, nunha recente visita á contorna do Mosteiro de Carboeiro Carboeiro e á área fluvial da Carixa os concelleiros locais, Erea Rey e Xerardo Díaz, puideron comprobar in situ "a acumulación de abundante escuma nos remansos, o que permite deducir que se trata dunha vertedura de augas contaminadas con deterxentes".

A voceira municipal, Erea Rey, reclama dos organismos competentes "que se tomen en serio estas verteduras, que se repiten cada pouco tempo, e se adopten as medidas oportunas para rematar dunha vez con este tipo de accións que teñen un impacto severo na fauna e flora de ribeira, e que acaban por afectar a toda a conca do Ulla, da que beben e se alimentan milleiros de persoas".

 APOIO AO XORNALISMO PALESTINO

ECOS DA COMARCA APOIA AO XORNALISMO PALESTINO. Preme na imaxe para máis información.

“Levamos moito tempo dicindo que o saneamento das augas non é un capricho, senón

unha necesidade básica que debería ser unha prioridade para todas as administracións” recalca a portavoz, que lamenta que nos últimos anos non se teña producido ningún avance nin mellora na cobertura deste servizo no termo municipal de Silleda.

Para a portavoz municipal as autoridades competentes, Concellos e Xunta, teñen a

obriga de actuar de xeito contundente e con todas as ferramentas que lles brinda a lei "e non agardar como meros observadores dando conta do que se ve e excluíndose da responsabilidade destes acontecementos".

Publicidade

Preme na imaxe se queres contactar connosco.

Nesa liña, Rey insiste en que "é fácil ver como algunhas depuradoras verten auga con

residuos ao río", e insta ao Concello de Silleda a avaliar o estado e a capacidade das dúas estacións de tratamento de augas residuais coas que conta Silleda, "así como a reclamar de maneira urxente ao resto de Concellos lindeiros cos río Deza e os seus afluentes que fagan o propio, ante as sospeitas de que estas verteduras poidan ter orixe en EDAR que non fan ben o seu traballo de depuración".

Por último, o BNG reclama ao goberno ambición nesta materia e que traballe por estender este servizo de saneamento a máis vivendas, comezando por todas aquelas parroquias máis próximas a ambos cascos urbanos.