O BNG de Lalín pide recuperar e manter en condicións as instalacións deportivas ao aire libre

Ecos da Comarca/Lalín

O BNG de Lalín denuncia o "lamentable estado de conservación no que se atopan varias pistas deportivas ao aire libre do municipio, unha situación que, ao seu xuízo, evidencia a falta de mantemento e de atención por parte do goberno municipal". As instalacións, sinala, "presentan suciedade acumulada, falta de limpeza e un evidente deterioro, ofrecendo unha imaxe de abandono que non se corresponde co que deberían ser espazos públicos destinados á práctica deportiva e ao lecer da veciñanza".

Estado da pista exterior das instalacións deportivas ao carón do Carrefour, de titularidade municipal.

Desde o BNG consideran especialmente preocupante que estas instalacións, tantos as de titularidade municipal como as da Xunta, utilizadas diariamente por nenos, nenas, mozos, mozas e persoas adultas, non conten cun mantemento adecuado que garanta unhas condicións mínimas de seguridade, hixiene e accesibilidade. “Non é razoable que a veciñanza de Lalín teña que utilizar pistas deportivas que presentan un estado de conservación tan deficiente. Falamos de espazos públicos que deberían estar limpos, coidados e en condicións óptimas para a práctica deportiva”, sinala o Manuel Carbón, concelleiro do BNG de Lalín e responsable da Área de Deportes.

 PUBLICIDADE

Preme na imaxe para obter máis información deste evento.

A formación nacionalista reclama ao Concello que proceda de maneira inmediata á limpeza das pistas, á retirada da sucidade e dos residuos acumulados e á revisión do estado de conservación de todos os elementos das instalacións, incluíndo pavimentos, valados, canastras, porterías e demais equipamento deportivo.

 PUBLICIDADE

Preme na imaxe para obter máis información deste evento.

O BNG considera tamén necesario establecer un plan de mantemento periódico que evite que estas situacións se repitan e permita detectar e solucionar con rapidez os desperfectos que se vaian producindo. “Non abonda con actuar cando o deterioro xa é evidente. O Concello debe garantir un mantemento regular das instalacións deportivas municipais e asumir a responsabilidade de conservar en boas condicións os espazos públicos que utiliza a cidadanía”, sinala Carbón.

 PUBLICIDADE

Preme na imaxe para obter máis información do evento.

Desde o BNG de Lalín esixen, polo tanto, ao goberno municipal "que deixe de lado a política de abandono e actúe con rapidez, recuperando estas pistas deportivas e garantindo que a veciñanza poida utilizalas en condicións dignas. O deporte e o coidado dos espazos públicos tamén deben ser unha prioridade para o Concello de Lalín".