O BNG de Cruces pide á Xunta que repoña o profesorado no CEIP Cerdeiriñas de Piloño

A ANPA convoca para hoxe, xoves, unha concentración diante do colexio

Ecos da Comarca/Vila de Cruces

O BNG de Vila de Cruces vén de rexistrar unha moción no Concello tras ser coñecedores dos recortes de profesorado no colexio de Piloño. O obxectivo disto é trasladar urxentemente á Xunta a necesidade de repoñer dous profesores en Primaria no CEIP Plurilingüe de Cerdeiriñas.

"O profesorado está ao límite, pois a plantel non dá para ter profesorado de garda. Con que enferme un só profesor xa non se pode impartir clase con normalidade. A Consellaría de Educación está a incumprir a ratio nas aulas de agrupamentos, nas que o máximo se establece en 14 alumnos por agrupamento e neste caso hai 16 entre primeiro e segundo e 15 entre terceiro e cuarto".

A ANPA do CEIP Cerdeiriñas trasladou esta situación á Xefatura territorial. "Dende o BNG insistimos na urxencia de repoñer profesorado en Primaria, pois xa levamos preto dun mes de curso. Pídese que a Consellaría cumpra cos acordos e dote ao CEIP Plurilingüe de Cerdeiriñas do persoal necesario, e así garantir unha educación de calidade e unha situación digna para o persoal docente e non docente".

Dende o BNG lembran ao goberno local que deben cumprir o acordado en febreiro de 2024. "Deixamos que os orzamentos saísen adiante a condición de cumplir os seguintes compromisos: 20.000 euros para mantemento do CEIP Cerdeiriñas e do CEIP Nosa Señora da Piedade. Con isto acordouse construír os parques infantís e mellorar na seguridade de acceso aos centros. Tamén se acordou fomenar un convenio coa Consellaría de Educación para que asuman as súas competencias en canto a demandas históricas de ambos centros: cambio de ventás, teitos, renovación de aseos, elevadores, barreiras arquitectónicas…"

Publicidade

Preme na imaxe se queres contactar connosco.

Ademais disto o voceiro nacionalista de Vila de Cruces, Álex Fiúza, pide a máxima implicación do goberno local, "pois o CEIP Cerdeiriñas debe recibir maior apoio posible para recuperar a súa plantilla de profesorado. Isto aféctanos a toda a comunidade educativa e á poboación do noso concello en xeral".

A ANPA do centro, ANPA Paxarinhas, informa que hoxe, xoves 26, terá lugar unha concentración ás 16:15 nas portas deste colexio.

NOTICIA RELACIONADA:

• A ANPA do colexio cruceño Cerdeiriñas demanda á Consellería de Educación dous docentes máis: https://www.ecosdacomarca.com/post/a-anpa-do-colexio-cruce%C3%B1o-cerdeiri%C3%B1as-demanda-%C3%A1-conseller%C3%ADa-de-educaci%C3%B3n-dous-docentes-m%C3%A1is