Mulleres Rurais Santa Isabel de Escuadro recibe unha axuda para mellorar a accesibilidade do centro social

Trátase dunha subvención da Deputación de Pontevedra no marco do Plan Provincia Comunitaria 2025

Laura Moure/Silleda

A Asociación de Mulleres Rurais Santa Isabel de Escuadro vén de ser beneficiaria dunha

subvención da Deputación de Pontevedra no marco do Plan Provincia Comunitaria

2025, destinada á realización de obras de mellora da accesibilidade no Centro Social de

Escuadro.

A actuación permitirá acometer a reforma do aseo do centro social, adaptándoo ás

condicións de accesibilidade actuais, así como a execución dun drenaxe exterior, co

obxectivo de mellorar as condicións de uso e conservación do edificio, un inmoble de

uso social construído en 1929 e que constitúe un espazo fundamental para a vida

comunitaria da parroquia.

O proxecto non supón alteración da configuración xeral nin do uso do edificio, pero si

unha mellora necesaria para garantir que o centro social poida ser utilizado en

condicións de comodidade, seguridade e accesibilidade por todas as persoas,

especialmente maiores ou con mobilidade reducida.

Dende a Asociación de Mulleres Rurais Santa Isabel de Escuadro valórase moi

positivamente esta axuda, xa que “o centro social é un punto de encontro esencial

para a veciñanza da parroquia, onde se desenvolven actividades sociais, culturais e

comunitarias ao longo de todo o ano”. As melloras previstas permitirán “seguir

dinamizando o centro e facelo máis inclusivo e funcional”.

 Publicidade

Preme na imaxe para obter máis información.

O investimento total da actuación ascende a 7.813,42 euros, financiados ao abeiro

desta liña de axudas provinciais, e trátase dunha intervención sinxela pero moi

necesaria para prolongar a vida útil do edificio e reforzar o seu papel como espazo de

convivencia no rural.

Publicidade

Preme para contactar con nós e pregunta polas tarifas que son unha bicoca!

A asociación agradece á Deputación de Pontevedra o apoio prestado a través do Plan

Provincia Comunitaria, así como a colaboración das entidades implicadas, que fan

posible seguir mellorando os espazos comunitarios das parroquias.