González Casares defende a importancia de apostar "por unha Europa a prol dos interereses do sector agrogandeiro galego"

Nunha visita Trasdeza Natur sinalou que “os agricultores e gandeiros de Galicia ofrecen un servizo ambiental que debe ser recoñecido nas políticas agrarias europeas”

Ecos da Comarca/Silleda

O candidato ao Parlamento Europeo, o lalinense Nicolás González Casares, subliñou a importancia histórica das próximas eleccións europeas para o sector agrogandeiro galego e reclamou que apostar por “máis Europa” votando ao Partido Socialista como única opción que garante que se continúen impulsando políticas útiles de apoio ao sector primario. Nunha visita á explotación ecolóxica hortícola, Trasdeza Natur, situada na

parroquia de Cortegada (Silleda), e acompañado da alcaldesa deste concello, Paula Fernández, Casares destacou que a nova Política Agraria Común (PAC) deixará cifras de apoio económico históricas ás explotacións agrarias sostibles de Galicia.

Son 206.000.000€ os que chegarán a uns 23.000 produtores galegos a través das axudas directas da PAC 2023-2024. O candidato puxo a Trasdeza Natur como exemplo de iniciativa agraria sostible, merecente de fondos europeos do Plan de Recuperación para o impulso de novos proxectos de desenvolvemento agrario e sinalou que “os agricultores e gandeiros de Galicia ofrecen un servizo ambiental que debe ser recoñecido nas políticas agrarias europeas”.

Publicidade

Preme na imaxe para obter máis información deste evento.

Fixo fincapé en que “o esforzo de adaptación que ten o sector agroalimentario ás esixencias normativas débese reforzar con investimento que permita facer fronte a desafíos como o cambio climático, ao tempo que debe recoñecer o servizo ambiental que ofrecen agricultores e gandeiros, cuestión que seguiremos defendendo os socialistas en Bruxelas”.

Publicidade

Preme na imaxe se quere contactar connosco.

Casares incidiu en que eleccións europeas “teñen unha importancia capital para o rural galego”, pois as decisións que se tomen en Bruxelas durante o vindeiro mandato van incidir de maneira directa no sector agrogandeiro. Entre outras cuestións, o novo Europarlamento definirá a PAC post 2027 na que se “deberá garantir o financiamento xusto para as pequenas explotacións familiares de Galicia”, concluiu.