FEGADACE e o Concello de Lalín organizan o ciclo ‘Actívate polo dano cerebral adquirido’

A iniciativa, enmarcada no convenio colaboración existente entre ambas entidades,

desenvolverase do 25 de xuño ao 3 de xullo en distintos espazos do municipio de Deza

Laura Moure/IsmaelRS/Lalín

A Federación Galega de Dano Cerebral (FEGADACE) e o Concello de Lalín presentaron este mércores o ciclo de actividades ‘Actívate polo dano cerebral adquirido’, unha iniciativa orientada a concienciar á poboación lalinense sobre a casuística, dimensión e prevención desta discapacidade, provocada fundamentalmente por ictus e traumatismos cranioencefálicos. A programación, enmarcada no convenio de colaboración existente desde 2021 entre ambas entidades, combina accións informativas, formativas e deportivas que se desenvolverán entre o 25 de xuño e o 3 de xullo en distintas localización da capital do Deza. No acto participaron o presidente de FEGADACE, Luciano Fernández Pintor; a concelleira de Política Social, Carmen Canda; e Hernán García, coordinador da 3ª Carreira e Andaina Solidaria ‘Camiñando polo dano cerebral’, a principal actividade que integra a programación. Ademais, tamén asistiu o concelleiro de Deportes, Avelino Souto

Souto, Canda, Fernández e García durante a presentación. Autor: Ecos da Comarca.

Durante a rolda de prensa de presentación da proposta, Luciano Fernández Pintor, presidente da Federación, agradeceu a colaboración do consistorio e sinalou a necesidade de que todas as administracións se involucren na loita contra o descoñecemento desta súbita lesión cerebral, tanto desde a prevención como mediante a prestación de recursos de atención de calidade e suficientes.

O representante de FEGADACE sinalou que “a información, a capacitación e a promoción de hábitos de vida saudables son os mellores aliados para reducir a incidencia do dano cerebral” e lembrou que os máis de 7.000 novos casos de ictus que se rexistran cada ano en Galicia exemplifican que se trata dun “reto para a saúde pública de primeiro nivel”.

Pola súa banda, a concelleira de Política Social do Concello de Lalín, Carmen Canda, agradeceu a FEGADACE a súa contribución para a concienciación da veciñanza do municipio e destacou o carácter dinamizador da programación para a vida da vila.

Actividades para todos os públicos

O ciclo de actividades, desenvolto con financiamento da Consellería de Política Social, dentro dos programas con cargo á asignación tributaria do 0.7% do IRPF, pretende achegar a realidade do dano cerebral desde diferentes dimensións.

A programación arranca o 25 de xuño ás 16:30 h no Edificio Polivalente Manuel Rivero coa

sesión informativa ‘Aproximación ao dano cerebral adquirido’. A charla, destinada a público xeral, estará centrada na prevención da discapacidade a través da abordaxe das causas, os factores de risco, os signos e síntomas de alarma e as pautas de actuación ante a súa aparición, ademais de ofrecer información sobre os recursos de atención sociosanitarios dispoñibles na contorna.

O venres 28 de xuño, ás 16:30 horas, tamén no Edificio Polivalente Manuel Rivero, celébrase unha sesión informativa centrada en materia xurídica coa presentación da ‘Guía legal para persoas con dano cerebral adquirido. Aproximación á lei 8/2021 e a outras normativas de interese para o colectivo". .A actividade, dirixida tanto a profesionais do ámbito dos servizos sociais como a persoas e familias con dano cerebral, estará impartida por Miguel Vieito, avogado e responsable do servizo de asesoramento legal da Federación. Vieito detallará os cambios introducidos pola Lei 8/2021 e outras normativas na lexislación civil e procesual que afectan ao exercicio da capacidade xurídica das persoas con discapacidade

O día 30 de xuño celebrarase a 3ª Carreira e Andaina Solidaria ‘Camiñando #PoloDanoCerebral’, a actividade central da programación, e o 3 de xullo realizarase o obradoiro de sensibilización para público infantil Os Bolechas; no marco do Servizo Concilia do Concello de Lalín.

Publicidade

Preme na imaxe se queres saber máis deste evento.

Finalmente, están previstas tres sesións do obradoiro ‘Autocoidados para mulleres coidadoras’, especialmente dirixido a quen presta coidados informais no ámbito do dano

cerebral e deseñada co fin de facilitar información e pautas que axuden a exercer este rol sen desatender a atención á propia saúde. A actividade terá lugar o 26 de xuño ás 16:30 horas no Local Social de Vilatuxe, o 2 de xullo ás 16:30 horas no Local Social de Goiás, e o 3 de xullo ás 16:30 horas no Local Social de Cercio.

As persoas interesadas en inscribirse en calquera das actividades poden facelo de forma

gratuíta no teléfono 689 083 144 e de maneira presencial na área de Servizos Sociais do

Concello de Lalín .

3ª Carreira e Andaina Solidaria ‘Camiñando #PoloDanoCerebral’

Unha das grandes citas da programación é a terceira edición da carreira e andaina solidaria ‘Camiñando #PoloDanoCerebral’. A xornada deportiva, realizada baixo a coordinación do Centro ET Encuentra Tu Potencial e Champion Chip Norte, celebrarase o domingo 30 de xuño desde as 9:00 horas na praza de Galicia, onde se situará o arco de saída e meta das distintas modalidades. As probas, con percorridos accesibles e diferentes distancias a realizar, son:

•  Carreira de 5 km e 10 km: persoas adultas e categoría Sub16 no caso dos 5km.

•  Carreiras escolares: cativada menor de 14 anos e nada en 2017 e anos posteriores.

Ademais, as nenas e nenos que o desexen poderán participar no obradoiro ‘Fast Heroes’, unha actividade lúdica para sensibilizar a poboación escolar na prevención do ictus.

•  Andaina de 7 km: aberta a participación de persoas de todas as idades.

Publicidade

Preme na imaxe se quere contactar connosco.

A inscrición está aberta até o 27 de xuño ás 23:59 horas na páxina web de Champion Chip Norte  onde tamén se pode consultar o regulamento da proba. O custo por participar varía en función da modalidade, pero todos os fondos recadados estarán destinados a financiar a organización da actividade e a desenvolver as distintas liñas de actuación da Federación para a mellora da calidade de vida das persoas con dano cerebral.

Nese senso, as persoas que non poidan asistir á proba poden realizar unha doazón na modalidade ‘Dorsal 0’ ou, en caso de ser unha empresa ou entidade, colaborar a través dun patrocinio. Até o de agora, a xornada conta co apoio de GSI Dotación Industrial, Kalekói, Autobuses Rías Baixas, Eroski, Global Develop Event Service, Piscofino Gourmet, MOVE Centro de Saúde e Movemento, Daveiga e Clube Ciclista Montes do Deza.