O BNG organiza en Palas unha charla mañá sobre as farmacias de garda
Montse Prado e Rubén Lois abordarán os problemas que provocan as gardas farmacéuticas afastadas dos PAC e as propostas do BNG para garantir a continuidade da atención sanitaria
Ecos da Comarca/Palas de Rei
O BNG de Palas de Rei organiza este mércores 23 de setembro, ás 20:30 horas na Casa da Cultura, a charla “Apertura das farmacias de garda e o dereito a unha saúde integral”, na que participarán Montse Prado, portavoz de Sanidade do BNG no Parlamento galego, e Rubén Lois, responsable local do BNG.
O encontro abordará os problemas que está a provocar no rural o actual sistema de quendas das farmacias de garda, que pode obrigar as persoas que acoden a un Punto de Atención Continuada a realizar posteriormente desprazamentos de varios quilómetros para conseguir a medicación que lles acaba de ser prescrita.
PUBLICIDADE
O BNG defende que a organización das gardas debe garantir a continuidade entre a atención sanitaria e a dispensación dos medicamentos, evitando especialmente no rural percorridos innecesarios que afectan con maior intensidade ás persoas maiores ou a quen non dispón de vehículo propio.
PUBLICIDADE
Durante a charla, Montse Prado explicará as iniciativas impulsadas polo BNG no Parlamento galego para que haxa unha farmacia de garda na localidade na que estea situado un PAC ou un servizo de urxencias, mentres que Rubén Lois abordará esta problemática desde a realidade de Palas de Rei e da comarca.
Comentarios