Debemos dar máis preferencia á dereita neste país

Ecos da Comarca/Xeral

Hoxe imos falar dun deses temas que seguramente todos vimos na autoescola no seu momento pero que, sendo totalmente sinceros, moitas veces non están nada claros no día a día. Refírome a eses momentos de certa tensión que vivimos ao volante cando chegamos a un cruce e non sabemos moi ben se debemos pasar ou esperar. Son situacións onde a teoría parece borrarse da mente e a dúbida apodérase de nós, sobre todo cando hai máis coches implicados e ninguén quere dar o primeiro paso por medo a cometer unha infracción ou, peor aínda, ter un golpe.

Para que nos entendamos mellor, imos viaxar mentalmente a dous puntos moi concretos das nosas comarcas. O primeiro caso atopámolo na estrada que une Santiso con Arzúa, xusto cando xa entramos no casco urbano de Arzúa. Nese punto, esa estrada atópase coa Nacional 547 e tamén coa rúa da Cruz Vermella. Imaxinade a escena porque é moi habitual. Ti vés subindo desde Santiso e a túa intención é xirar para continuar pola Nacional 547 en dirección a Santiago de Compostela. Ao mesmo tempo, aparece outro vehículo que vén baixando pola rúa da Cruz Vermella e que quere seguir en dirección a Melide.

Aquí é onde comeza o dilema. Sempre nos dixeron que a preferencia é para o que sae pola dereita, pero que pasa se, dadas as traxectorias, os dous sentimos que saímos pola dereita do outro ou as nosas rutas se cruzan de xeito que a norma non parece tan obvia? Ese momento no que os dous condutores se miran fixamente, intentando adiviñar a intención do outro, é un clásico das mañás en Arzúa.

 PUBLICIDADE

Preme na imaxe para obter máis información do evento.

E este non é o único lugar onde pasa isto. Podemos movernos ata o famoso cruce dos oitos, en Rendos. Alí prodúcese unha situación case idéntica. Imaxinade un coche baixando de Pezobre en dirección a Visantoña, mentres ti vés subindo de Arzúa e a túa idea é xirar cara a Melide. Volvemos estar na mesma tesitura que no caso anterior. Nos dous escenarios vemos condutores buscando un oco para meterse, dubidando, e case ninguén ten a idea clara de quen ten a prioridade real segundo o código de circulación.

Podería seguir poñendo máis exemplos prácticos porque a nosa rede de estradas está chea destes puntos negros de interpretación, e estou seguro de que un bo número de vós sabe perfectamente de que cruces estou a falar porque os sufrides cada semana. O problema é que, ante a dúbida, moitas veces acabamos aplicando a lei da selva. Tomamos como bo que ten preferencia o que chega antes ao cruce? Ou quizais pensamos que o que leve o vehículo máis grande ten máis dereito a pasar?

 PUBLICIDADE

Preme na imaxe para contactar connosco.

A realidade é que necesitamos un profesor de autoescola na sala, ou polo menos aquí nas redes, que nos dea unhas pequenas pautas claras para estes puntos tan específicos. Mentres tanto, gustaríame saber que pensades vós ou como actuaríades nestes cruces. Deixádeme nos comentarios se coñecedes outros puntos conflitivos coma estes e como facedes para saír deles sen un susto.