A Xunta somete a información pública o proxecto dunha granxa de máis de 80.000 galiñas en Agolada
Ecos da Comarca/Agolada
A Xunta de Galicia somete a información pública o estudo de impacto ambiental e a solicitude de autorización ambiental integrada para a construción dunha nova explotación avícola de posta no concello de Agolada. O proxecto, promovido pola empresa Avícola Axiaz, S.L., con domicilio social en Vila de Cruces, prevé unha capacidade para 80.788 galiñas poñedoras, destinadas á produción de ovos de tipo II.
Segundo o anuncio publicado hoxe, 12 novembro 2026, no Diario Oficial de Galicia (DOG), a iniciativa contempla a construción dunha nave avícola e dun centro de clasificación e envasado de ovos, ademais dunha esterqueira para o almacenamento do esterco xerado pola actividade. A instalación estará situada na rúa Fondelo, en Agolada.
PUBLICIDADE
No relativo á xestión ambiental, o proxecto establece que as augas residuais procedentes da limpeza das naves, dos aseos e dos vestiarios, así como os lixiviados da esterqueira, serán conducidos a depósitos estancos para a súa posterior xestión por parte dun xestor autorizado. Pola súa banda, as augas pluviais verteranse directamente ao terreo. O esterco producido na explotación tamén será recollido por un xestor autorizado.
30 días hábiles para presentar alegacións
A documentación do proxecto, que inclúe o estudo de impacto ambiental e o proxecto básico para solicitar a autorización ambiental integrada, permanecerá en exposición pública durante un prazo de 30 días hábiles, contados desde o día seguinte ao da publicación do anuncio no DOG.
PUBLICIDADE
Durante este período, calquera persoa interesada poderá consultar a documentación e presentar as alegacións, suxestións ou observacións que considere oportunas. O expediente poderá consultarse nas dependencias da Dirección Xeral de Calidade Ambiental e Sostibilidade, en Santiago de Compostela, así como na páxina web da Consellería de Medio Ambiente e Cambio Climático, no apartado de proxectos en información pública (GAIA).
Cabe mencionar que esta granxa súmase á outra de 365.000 galiñas poñedoras que tamén se pretende instalar neste municipio e que está tendo gran oposición social.
NOTICIAS RELACIONADAS:
A Xunta tramita o proxecto dunha granxa de 365.500 galiñas poñedoras en Agolada: https://www.ecosdacomarca.com/post/a-xunta-tramita-o-proxecto-dunha-granxa-de-365-500-gali%C3%B1as-po%C3%B1edoras-en-agolada
O Sindicato Labrego Galego alegará contra a macrogranxa de 365.500 galiñas de Agolada: https://www.ecosdacomarca.com/post/o-sindicato-labrego-galego-alegar%C3%A1-contra-a-macrogranxa-de-365-500-gali%C3%B1as-de-agolada
O BNG de Agolada alerta do impacto da explotación de 365.500 galiñas e reclama unha avaliación: https://www.ecosdacomarca.com/post/o-bng-de-agolada-alerta-do-impacto-da-explotaci%C3%B3n-de-365-500-gali%C3%B1as-e-reclama-unha-avaliaci%C3%B3n
Stop Macrogranxas Agolada alerta dos riscos da explotación de 365.400 galiñas:https://www.ecosdacomarca.com/post/stop-macrogranxas-agolada-alerta-dos-riscos-da-explotaci%C3%B3n-de-365-400-gali%C3%B1as
Stop Macrogranxas Agolada supera as 1.000 alegacións contra a macrogranxa de 365.000 galiñas: https://www.ecosdacomarca.com/post/stop-macrogranxas-agolada-supera-as-1-000-alegaci%C3%B3ns-contra-a-macrogranxa-de-365-000-gali%C3%B1as
Greenpeace oponse frontalmente á macrogranxa avícola de Agolada: https://www.ecosdacomarca.com/post/greenpeace-oponse-frontalmente-%C3%A1-macrogranxa-av%C3%ADcola-de-agolada
Comentarios