Lalín reunirá a 120 nenos e nenas de 13 clubs galegos no I Trofeo Terras do Deza de Patinaxe Artística
A cita está organizada polo Club Aehde Lalín Patín e será o 15 de novembro
Laura Moure/Lalín
Lalín converterase este domingo, 15 de novembro, nun punto de encontro da patinaxe artística galega coa celebración do I Trofeo Terras do Deza, organizado polo Club Aehde Lalín Patín.
A competición reunirá arredor de 120 nenos e nenas pertencentes a 13 clubs de Galicia, entre os que se atopa o propio club organizador. Os participantes competirán en diferentes categorías e niveis, desde nivel 0 ata amateur, nunha xornada dedicada ao deporte e á patinaxe artística.
PUBLICIDADE
O evento desenvolverase no Lalín Arena en horario de mañá e tarde. As actuacións comezarán ás 10:00 horas e prolongaranse ata as 14:00 horas, retomándose ás 16:00 e rematando ás 20:00 horas.
A entrega de trofeos terá lugar en dúas quendas: ás 14:00 horas, ao remate da sesión de mañá, e ás 20:00 horas, unha vez finalizada a competición da tarde.
PUBLICIDADE
A entrada será totalmente gratuíta, polo que a organización anima á veciñanza a achegarse ao Lalín Arena para apoiar os participantes e gozar dunha xornada de patinaxe artística.
O trofeo conta coa colaboración de diferentes entidades e empresas, así como co apoio institucional do Concello de Lalín, a Deputación de Pontevedra e a Xunta de Galicia.
Comentarios