Un veciño de Dozón leva á Valedora do Pobo o contrato da nova residencia de maiores

Denuncia que o proceso de adxudicación non garante prazas para os empadroados no municipio e alerta dun posible "éxodo forzoso" dos maiores locais

Ecos da Comarca/Dozón

O proceso de xestión da nova Residencia e Centro de Día de Dozón enfrontase a un exame institucional. O pasado 24 de febreiro de 2026, un veciño do municipio, Mario Vila López, presentou unha queixa formal ante a Valedora do Pobo. No seu escrito, denuncia que o contrato de xestión asinado polo Concello de Dozón "vulnera o dereito á protección social da poboación rural ao non incluír cláusulas de reserva para os habitantes locais".

Terreos onde se construirá a residencia de Dozón.

As claves da queixa particular

O reclamante expón catro puntos críticos sobre a situación actual da infraestrutura:

• Falta de reserva de prazas: O contrato non garante ningunha praza para os veciños empadroados no municipio.

• Risco de despoboamento: Vila alerta de que, nun concello con menos de 1.000 habitantes, o uso de recursos públicos para un centro que non asegure o servizo local obriga aos maiores a un "éxodo forzoso" mentres o centro acolle a persoas foráneas.

• Cuestións económicas: Denuncia que a falta de convenios sociais prexudica aos veciños con rendas baixas, maioritariamente dependentes de pensións agrarias.

• Opacidade administrativa: Sostén que o proceso de exposición pública non tivo a transparencia necesaria para que a cidadanía puidese presentar alegacións.

 Publicidade

Preme para obter máis información.

Resposta e admisión a trámite

A Valedora do Pobo, María Dolores Fernández Galiño, comunicou o pasado 3 de marzo a admisión a trámite desta queixa. Tras estudar o caso, a institución considera que a reclamación reúne os requisitos formais e atopa cobertura constitucional.

Como consecuencia directa desta admisión:

1. Iniciáronse actuacións ante a Consellería de Política Social e Igualdade e o Concello de Dozón.

2. Ambas administracións teñen un prazo de 15 días para facilitar información detallada sobre o obxecto da queixa.

3. A Valedora investigará se houbo falta de transparencia na exposición pública do contrato.

 PUBLICIDADE

Preme na imaxe para contactar con nós!

Demandas do reclamante

A solicitude de Mario Vila busca que o Concello de Dozón revise o contrato ou asine un convenio anexo que inclúa unha Reserva de Prazas e unha Cota de Bonificación para os residentes do municipio. Así mesmo, insta á Xunta de Galicia a que o arraigo territorial sexa un criterio de prioridade absoluta nas prazas concertadas.