Ulloa Viva, a PDRA e Mina de Touro-O Pino Non chaman a “poñer fin” á ameaza de Altri

Chaman de novo a toda Galicia a “seguir deslexitimando socialmente o proxecto de Altri, e demandar que dunha vez por todas que a Xunta dea carpetazo definitivo á macrocelulosa”

Ecos da Comarca/Xeral

A Plataforma Ulloa Viva (PUV), a Plataforma en Defensa da Ría de Arousa (PDRA) e a Plataforma veciñal contra a Mina de Touro-O Pino fixeron onte un chamamento para “volver colapsar Compostela” o vindeiro 14 de decembro na manifestación convocada pola PUV e a PDRA reclamando “Altri No. Fóra Xa!” e co lema “Desde o río ata o mar, polas que somos e polas que virán”. Un ano despois da gran manifestación nacional de 100.000 persoas ao berro de “Altri Non” polas rúas de Santiago, os presidentes de Ulloa Viva e a PDRA, Juan Pedro Sánchez e Xaquín Rubido, e a voceira da Plataforma veciñal Mina de Touro-O Pino Non, Che Cancelo chamaron de novo a toda Galicia a “seguir deslexitimando socialmente o proxecto de Altri, e demandar que dunha vez por todas que a Xunta dea carpetazo definitivo á macrocelulosa”.

Na Alameda de Compostela, de onde sairá a manifestación o domingo 14 de decembro, as plataformas e os colectivos que apoian a convocatoria, explicaron que “igual que o 15 de decembro de 2024 o río Ulla chegou ao Obradoiro, o 14D haberá un bosque galego no medio da praza, defendendo de novo o noso medio ambiente, a nosa biodiversidade, o noso pasado, presente e futuro”, sinalaron. Centos de paraugas convertidos en carballos, castiñeiros ou sobreiras reivindicarán na manifestación contra Altri en Compostela que “os nosos recursos e patrimonio non van ser vendidos pola Xunta a ningunha industria que quere facernos vivir peor por beneficiar economicamente a catro”.

“Xa que a Xunta non escoita á veciñanza, levarémoslle ao Obradoiro o monte galego que está obrigada por lei a protexer”, asegurou o presidente de Ulloa Viva, Juan Pedro Sánchez. Segundo explicou, a veciñanza “seguimos preocupados porque a pesares dos “non” recibidos nos últimos meses ao proxecto, a Xunta de Galicia non lle da carpetazo definitivo, non nos da tranquilidade para volver ás nosas vidas logo de ternos obrigados nos últimos dous anos a defendernos dunha multinacional e dos nosos propios gobernantes da imposición pola forza dunha industria altamente contaminante”.

Desde Ulloa Viva “pedimos encarecidamente que a Xunta volva ao sentido común, pense na saúde da cidadanía, na xestión responsable dos nosos recursos hídricos e no uso adecuado da terra”. Lembrou o presidente da Plataforma que a Xunta “debe garantir o futuro das nenas e nenos e senón é capaz deixar sitio para que outros gobernantes o fagan e non martirizar a un pobo que só quere vivir ben respectando o medio que habita”.

Altri sería “a pena capital” para a Ría de Arousa

O presidente da PDRA, Xaquín Rubido, explicou en Lugo que “a situación que estamos vivindo na Ría de Arousa xa é unha situación crítica”, segundo dixo “estamos vivindo un momento crucial para o futuro do sector marisqueiro e do mexillón de toda Galiza, porque o centro de gravidade está na Ría de Arousa”. Rubido sinalou que a realidade que está vivindo a Ría de Arousa é xa “moi dura” polo “abandono total das súas competencias por parte da Xunta” e advertiu que “non hai ningún viso de reacción” do goberno galego para “reconducir esta situación”.

 Publicidade

Preme na imaxe para obter máis información.

Detrás desta “pasividade dolosa por parte da Xunta”, afondou o presidente da PDRA, está “a vontade da Xunta de mudar o modelo produtivo e favorecer que se destrúa o modelo produtivo tradicional e substituílo pola acuicultura industrial e privatizar o mar”. Segundo sinalou Rubido “si a isto lle engadimos colocar unha macrocelulosa na cabeceira do Ulla, cunha contaminación de 65 toneladas diarias de produtos químicos e unha demanda de auga altísima e contaminación térmica de auga a 27 graos”. Isto nos fala dunha “pena capital” para a Ría de Arousa. Construír a celulosa de Altri en Palas “ten un custe”, explicou o presidente da PDRA, que é “sacrificar o conxunto do tecido produtivo da ría de Arousa, o sector agrogandeiro e o Camiño de Santiago”.

Diante desta situación, Xaquín Rubido fixo un “chamamento urxente a toda a sociedade galega a actuar, a tomar decisións que amosen que o pobo galego non queren o modelo de país que nos quere impoñer a Xunta “.

“Os maiores perigos ambientais” de Galicia

A voceira da Plataforma Veciñal contra a Mina de Touro-O Pino, Che Cancelo sinalou na rolda de prensa que o río Ulla “é a arteria coronaria que dá o osíxeno ao corazón do país”, unha arteria que segundo dixo é “fundamental para a supervivencia dos nosos sectores produtivos da terra e do mar”. Engadiu Candela que o río Ulla “dános calidade de vida e asenta a poboación no territorio” e alertou de que “hoxe o maior perigo ambiental na Galiza son os proxectos de Altri e a Mina de Touro”.

Publicidade

Preme para contactar con nós e pregunta polas tarifas que son unha bicoca!

Segundo explicou a voceira da plataforma veciñal, “aínda hoxe, coa vella mina pechada segue a haber residuos contaminantes que, polo Ulla, chegan á ría de Arousa”. Che Cancelo puxo o foco sobre “quen se beneficia destes proxectos” e concluíu que “o pobo galego non”, o que nos leva a “intereses económicos especulativos que se van levar a nosa riqueza para fóra e só van deixarnos contaminación e destrución”.

Desde a plataforma fixeron tamén un chamamento a participar o 14 de decembro na manifestación convocada en Compostela, porque segundo dixo Cancelo “queremos seguir vivindo neste país e deixarlle ás nosas fillas e netos un territorio e unha paisaxe onde se poida vivir sen contaminación e con dignidade”.