UCIN Galicia reivindica a creación dun sistema único de emerxencias para combater os lumes forestais

Ecos da Comarca/Xeral

A Unión de Cidadáns Independentes (UCIN) en Galicia fai un chamamento ás administracións públicas para impulsar a implantación dun sistema único de emerxencias que permita unha resposta máis rápida, eficaz e coordinada fronte aos incendios forestais.

A formación subliña que unha correcta identificación do nivel de risco e a aplicación de protocolos unificados garantirían unha escalada progresiva de recursos, evitando duplicidades, mellorando a coordinación e ofrecendo maior seguridade tanto aos equipos de extinción como á cidadanía.

O Coordinador de UCIN en Galicia, José Luis Calo, declarou: “A seguridade dos cidadáns e a preservación da nosa contorna deben situarse por encima de calquera diferenza política. Galicia necesita un sistema único de emerxencias que garanta eficacia, transparencia e coordinación real entre todas as administracións implicadas. Só así poderemos dar unha resposta á altura do reto que supón o cambio climático e a crecente ameaza dos incendios forestais”.

Publicidade

Preme na imaxe se queres contactar connosco.

UCIN Galicia lembra que os veráns cada vez máis secos e calorosos, consecuencia do cambio climático, converten a prevención e a coordinación interinstitucional nun factor decisivo para protexer o patrimonio natural galego e ás comunidades rurais. A organización política reitera o seu compromiso de traballar de maneira construtiva coas distintas administracións e a sociedade civil, achegando solucións prácticas que reforcen a seguridade cidadá e a defensa do medio ambiente.