UCIN Galicia: "Mercosur afoga o rural galego mentres os representantes políticos miran para outro lado"

A formación política adverte "dunha competencia desleal absolutamente inaceptable"

Ecos da Comarca/Xeral

UCIN Galicia, a través do seu coordinador José Luis Calo, reclama unha resposta

inmediata, firme e sen ambigüidades das administracións competentes fronte ás

graves consecuencias que o acordo comercial entre a Unión Europea e Mercosur terá

para o sector primario galego, especialmente para os produtores de carne e leite.

Onte hubo distintas concentracións en Galicia en contra do acordo de Mercosur. Fonte: Elas Eles

"Desde UCIN Galicia advertimos dunha competencia desleal absolutamente inaceptable, derivada da entrada de produtos procedentes de Mercosur con aranceis baixos e estándares sanitarios, ambientais e laborais moi inferiores aos que se lles esixen aos gandeiros galegos. Mentres en Galicia se cumpre estritamente coa PAC, coa normativa europea e cunha elevada carga de custos, permítese a importación masiva de producións obtidas en condicións que nunca serían legais na Unión Europea".

Esta situación, apunta, "sitúa á produción galega nunha clara desvantaxe fronte a modelos de produción extensiva e a grande escala, poñendo en risco a viabilidade económica de

milleiros de explotacións, o emprego no rural e o equilibrio territorial".

 Publicidade/DOAZÓN PARA ECOS DA COMARCA

Ademais, UCIN Galicia denuncia tamén "a escasa ou nula actuación dos actuais responsables políticos no Parlamento español e no Parlamento Europeo, incapaces de defender os intereses do sector primario galego e de garantir a protección dos fondos da PAC e dos programas específicos de desenvolvemento rural, hoxe seriamente ameazados polas novas propostas comunitarias e polo propio acordo UE-Mercosur. As organizacións agrarias galegas veñen manifestando de forma clara o seu rexeitamento a este acordo, unha posición que UCIN Galicia comparte e respalda plenamente".

Demandas urxentes de UCIN Galicia

1. Presión política e reivindicación

• Esixir ao Goberno de España e á Unión Europea a aplicación inmediata de cláusulas de salvagarda reais e efectivas, que permitan bloquear importacións cando non se cumpran as mesmas condicións esixidas aos produtores europeos.

• Implantar un etiquetado obrigatorio, claro e transparente sobre a orixe e as condicións de produción (ambientais e sociais), permitindo ao consumidor diferenciar e priorizar o produto galego.

• Establecer medidas de apoio directo á rendibilidade das explotacións, incluíndo axudas para a incorporación de xente nova, compensacións polos elevados custos de produción e primas ligadas á calidade e á sustentabilidade.

 Publicidade

Preme na imaxe para obter máis información.

2. Loita contra as enfermidades gandeiras (DNC)

• Reclamar ao Ministerio de Agricultura unha coordinación estatal efectiva, con medidas homoxéneas fronte á Dermatosis Nodular Contaxiosa (DNC).

• Esixir o impulso dunha vacina preventiva a nivel europeo.

• Garantir indemnizacións contundentes, xustas e inmediatas no caso de detectarse focos en Galicia, evitando que os gandeiros paguen as consecuencias da inacción institucional.

3. Fomento do consumo local

• Promover campañas estables de “Compra Galego”, que conciencien á cidadanía da importancia de apoiar ao produtor local e de manter vivo o territorio.

• Impulsar a preferencia polos produtos galegos na restauración colectiva e nas compras da administración pública.

Publicidade

Preme para contactar con nós e pregunta polas tarifas que son unha bicoca!

4. Fortalecemento do sector

• Apostar pola valorización dos produtos galegos, como a carne de vacún, reforzando selos de calidade recoñecidos como a IXP Ternera Galega.

• Apoiar a diversificación e modernización das explotacións, garantindo a súa competitividade e sustentabilidade a longo prazo.

José Luis Calo subliña que “non se pode seguir sacrificando o sector primario galego en nome de acordos comerciais que benefician a terceiros países mentres se abandona a quen sostén o noso rural e a nosa soberanía alimentaria”. UCIN Galicia continuará defendendo con firmeza ao campo galego e esixindo responsabilidades políticas alí onde hoxe só hai silencio e deixación de funcións.

ECOS DA COMARCA falamos o sábado cun gandeiro de Palas de Rei (Lugo) sobre Mercosur. A entrevista no enlace: https://www.facebook.com/reel/1776689349631691