Troitiño tacha de “despropósito” e “caza de bruxas” o precalendario de 2023 elaborado por Corral
Considera que a eliminación das subidas da Estrada e A Pontenova “como represalia a escuderías que non se someten á súa ditadura é a gota que colma o vaso” e augura “posibles mobilizacións”
Ecos da Comarca/Deza
O candidato de Xeración- RenovaFGA á presidencia da Federación Galega de Automobilismo (FGA), o lalinense Antonio Rodríguez Troitiño, cualificou este luns como “un despropósito” e unha “caza de bruxas” o comunicado publicado pola FGA coa solicitude das probas precalendadas para 2023 diante da Dirección General de Tráfico (DGT).
Entre as “novidades máis impactantes” está a “sorprendente eliminación” das subidas da Estrada e A Pontenova, “dúas das probas máis relevantes desta modalidade”, como “represalia a escuderías que non se someten á súa ditadura”, así como o solapamento en datas da Subida a Taboadela coa Subida a Chantada e ausencias como a do Rali de Noia no precalendario de rallyes.
“Estas modificacións inxustificadas son a gota que colma o vaso e non descartamos todo tipo de mobilizacións para obrigar á dirección da FGA a corrixir este despropósito. Neste precalendario Iván Corral está a axustar contas dunha forma ditatorial contra entidades que non bailan ao seu son pero que acreditan ao seu favor a organización dalgunhas das mellores probas da súa modalidade. Por iso, apelamos á intervención da Secretaría Xeral para o Deporte para impedir este novo atropelo contra uns dos verdadeiros artífices da puxanza do automobilismo galego, como son as escuderías”, argumenta Troitiño.
“Estas entidades prexudicadas teñen todo o noso apoio e non están soas. Chegaremos
onde faga falta para acabar con este comportamento mafioso e ditatorial. E pedímoslle a todos os deportistas e demais entidades que tomen consciencia desta forma de proceder, ou comigo ou contra min, porque hoxe pásalle a estas escuderías, pero mañá pode pasarlle a calquera”, salienta.
Para Rodríguez Troitiño, “é necesario que o día 1 de novembro todos lle demostren a Iván Corral que o automobilismo galego está farto da súa estratexia do medo e das súas represalias. Estas decisións son unha nova senrazón e a proba máis tanxible de que Iván Corral está a vivir as súas últimas semanas como presidente da FGA”, concluíu.
Comentarios