Suprimidas en Silleda as mesas electorais das parroquias de Ponte e Saídres

A Oficina do Censo Electoral obrigou ao Concello a eliminalas ao rexistrar un número de votantes moi próximo ao límite mínimo de 200 electores establecido pola LOREG

Laura Moure/Silleda

A Oficina do Censo Electoral obrigou ao Concello de Silleda a suprimir a mesa C do distrito 01, sección 002, correspondente ás parroquias de Ponte e Saidres, ao rexistrar un número de votantes moi próximo ao límite mínimo de 200 electores establecido pola LOREG. A mesa conta actualmente con 202 persoas inscritas, das cales 100 pertencen á parroquia de Ponte e 102 á de Saidres. A proximidade a este límite fai necesaria a súa eliminación e a redistribución do electorado noutras mesas próximas.

Deste xeito, os veciños e veciñas de Ponte deberán votar a partir de agora no Polideportivo Municipal de Silleda, mentres que os de Saídres pasan ao Teleclub de Negreiros. Con esta reorganización se garante tamén que a mesa de Negreiros, que conta con 204 electores, non desapareza, ao medrar ata os 306 electores incorporándose os de Saidres.

Xunto a esta modificación obrigada pola autoridade electoral, aprobouse tamén, neste caso a proposta do Concello de Silleda, o desdobramento de dúas das mesas situadas no Polideportivo Municipal de Silleda. Nas últimas eleccións rexistráronse longas colas debido

ao exceso de votantes concentrados nestas mesas, que superaban os 800 e 1.000 electores respectivamente. Con esta medida, a vila de Silleda pasará a ter 6 mesas, co fin de evitar colapsos e axilizar as xornadas electorais.

 Publicidade

Preme na imaxe para obter máis información.

Ademais, no caso das parroquias de Laro, Parada e Refoxos, con 428 electores, cámbiase de sección, pero non supón cambio de local, polo que os veciños continuarán exercendo o voto no Centro Cultural de Laro.

O Concello xa remitiu comunicacións personalizadas ás persoas electoras de Ponte e Saidres, ao seren as máis afectadas polos cambios, co fin de informarlles do novo local e mesa electoral que lles corresponde.

Publicidade

Preme na imaxe se queres contactar connosco.

Esta comunicación ten carácter exclusivamente informativo. Como é habitual antes de cada proceso electoral, todas as persoas electoras recibirán no seu domicilio a correspondente tarxeta censal enviada polo Instituto Nacional de Estatística (INE), onde se indicará de forma detallada o colexio e a mesa onde lles corresponde exercer o seu dereito ao voto. Dende o Concello agradécese a comprensión da veciñanza, e infórmase que para calquera dúbida ou aclaración poden poñerse en contacto co Concello.