Rodeiro aproba pedir á Deputación un fondo de compensación para os concellos de maior extensión da provincia

Ecos da Comarca/Rodeiro

O Pleno do Concello de Rodeiro aprobou onte, por maioría do Grupo de Goberno, unha moción presentada polo Grupo Socialista na que se solicita á Deputación de Pontevedra a creación dun fondo de compensación específico para os concellos de maior extensión territorial da provincia, concretamente para aqueles que superan os 100 km² de superficie.

A iniciativa propón a creación dunha nova liña de axudas dotada con 7 millóns de euros, destinada a 13 concellos da provincia de Pontevedra que, pola súa ampla extensión e carácter rural, afrontan maiores dificultades para manter e mellorar os servizos municipais básicos.

O alcalde de Rodeiro, José Luís Camiñas, destacou que “este fondo sería unha excelente noticia para os concellos rurais, xa que permitiría compensar o enorme custo que supón o mantemento das vías municipais e das infraestruturas locais, especialmente nun territorio no que o principal tecido económico é a agricultura”.

 Publicidade/DOAZÓN PARA ECOS DA COMARCA

Neste sentido, o alcalde subliñou que a actividade agrícola provoca un desgaste constante e moi elevado nas estradas municipais, “un deterioro que é, literalmente, terrorífico para as arcas municipais se non se conta con apoio doutras administracións”.

Desde o Concello de Rodeiro deféndese que esta medida non só suporía un alivio económico para os concellos máis extensos, senón que tamén contribuiría a fortalecer o tecido económico rural, mellorar os servizos públicos e favorecer que a xente poida vivir no rural con dignidade.

 Publicidade

Preme na imaxe para obter máis información.

“O obxectivo final é devolver vida ao rural, atraer poboación e garantir servizos dignos. Para iso, as deputacións, como administracións supramunicipais, deben cumprir o seu papel de apoio aos concellos máis pequenos e con maiores dificultades”, sinalou Camiñas.

Publicidade

Preme para contactar con nós e pregunta polas tarifas que son unha bicoca!

O Concello de Rodeiro xa acordou remitir a aprobación desta moción á Deputación de Pontevedra, solicitando formalmente que se poña en marcha esta nova partida económica que beneficiaría directamente aos concellos de maior extensión da provincia.