Resultados acadados polo club deportivo Biosbardo no Trail Vila de Cuntis, proba oficial da FGA

Ecos da Comarca/Xeral

A pasada fin de semana o máximo nivel competitivo do trailrunning galego deuse cita en Cuntis, onde estaban en xogo bonificacións no ranking galego tanto individual como de clubs multiplicando por cinco ó ser proba da “Serie Ouro” da Federación Galega de Atletismo. E ata alí tamén foron corredores do club deportivo Biosbardo.

CAMPIÓNS ABSOLUTOS POR EQUIPOS

MARÍA FREY – CAMPIOA ABSOLUTA

"Incontestable e intratable, a deportista biosbarda saíu a pelexar cos homes, sen dubidalo e intentando achegarse ás 2 horas de carreira, parando o crono dos 21k e 1200 metros de desnivel positivo en 2h e 5 minutos, sacándolle case un cuarto de hora (14 minutos) á segunda clasificada. Detrás dela, pelexando pola segunda praza atopábase Carla Trillo,

realizando unha carreira impecable ata que unha mala caída no km 12 a obrigaba a parar e continuar con moito coidado ata meta, chegando en 2h 22’ para colleitar puntos tanto no apartado individual como no colectivo. A deportista de Burela entrou 7ª absoluta en meta e bronce da súa categoría", sinala o club.

Pechaba o cadro feminino Charo Figueroa, facéndose coa prata máster así como contribuíndo a sumar os puntos necesarios para o ranking galego. E Teresa Dieste logrou un bronce na categoría máster.

 PUBLICIDADE

Se queres obter máis información do evento preme na imaxe.

No apartado masculino, o equipo foi liderado por Iván Sangiao (o corredor rabadense volta á competición), que entraría 7º absoluto en meta e prata de categoría, mentres que o cruceño Emilio Montilla chegaría na posición 12ª e vencendo a súa categoría máster. "Cabe destacar a baixa de última hora de Sergio García, o corredor máis rápido do equipo, que obrigou a non deixarse nada ós seus compañeiros para adicarlle a vitoria".

CAMPIÓNS POR EQUIPOS: A competición puntuaba os 2 primeiros homes e mulleres de cada combinado, co que a vitoria de María así como os postos destacados de Iván, Carla e ‘Milo’ fixeron que o CD Biosbardo se subise ó máis alto.

TRAMOS CRONOMETRADOS: Durante a proba, tres tramos obtiñan premio especial para o mellor home e a mellor muller neles, sendo un dos premios para a propia María Frey, mentres que Iván Sangiao ficaría 2º en dous deles a tan só un segundo de facerse co premio.

 PUBLICIDADE

Preme para obter máis información.

RANKING GALEGO

Con este resultado, o equipo feminino distánciase das súas perseguidoras no Ranking Galego; mentres que o combinado masculino sube postos ata a segunda praza. No apartado individual María Frey escala postos co obxetivo de formar parte da próxima Selección Galega; destacando que o club conta a día de hoxe con 5 atletas no Top 10: Tamara García (veciña de Dozón), Carla Trillo, María Frey, Charo Figueroa e Fanny Abelenda.

CARREIRA POPULAR CHANTADA:

Pola súa banda, a veciña de Dozón Tamara García, vencía con autoridade na Carreira Popular de Chantada desputada o sábado 9, un trazado sinuoso de 9 km.