Porque Galicia cóntase mellor cando se conta en galego: Feliz Día de Galicia!

Laura Moure/Xeral

Hoxe celebramos a nosa terra, a nosa cultura, as nosas tradicións e, sobre todo, a nosa lingua. Unha lingua que leva séculos transmitindo historias, emocións e a forma que temos de entender o mundo.

En ECOS DA COMARCA temos a sorte e a responsabilidade de facer xornalismo en galego. Dende o primeiro día apostamos por informar na lingua propia de Galicia porque entendemos que o galego non é só un medio para comunicar, senón unha parte esencial da nosa identidade. É a lingua coa que moitas persoas medraron, coa que falan nas súas casas, nas prazas, nas feiras e nas festas dos nosos pobos.

 PUBLICIDADE

Preme na imaxe para obter máis información deste evento.

Cada noticia que publicamos, cada entrevista, cada reportaxe e cada vídeo son tamén unha maneira de contribuír a que o galego siga presente no día a día, demostrando que é unha lingua viva, útil e plenamente capaz de contar a actualidade con rigor, proximidade e profesionalidade.

Nun momento no que a información circula a unha velocidade inmensa e onde as realidades máis pequenas ás veces quedan sen voz, nós seguiremos apostando por contar o que acontece nas nosas comarcas e por facelo en galego. Porque cremos no valor do xornalismo de proximidade e porque cremos que a nosa lingua merece ocupar o lugar que lle corresponde tamén nos medios de comunicación.

 PUBLICIDADE

Preme na imaxe para obter máis información do evento.

Neste 25 de xullo queremos agradecer a todas as persoas que nos acompañades cada día. A quen le as nosas noticias, comparte as nosas publicacións, nos envía información e confía no noso traballo. Grazas por facer posible que un medio local en galego siga medrando e levando a actualidade das nosas comarcas a milleiros de fogares.

Seguiremos traballando coa mesma ilusión e co mesmo compromiso: informar con honestidade, dar voz á nosa xente e facelo sempre na lingua que nos identifica.

 PUBLICIDADE

Preme na imaxe para ler o manifesto.

Porque Galicia cóntase mellor cando se conta en galego.

Feliz Día de Galicia!