Os ecoloxistas queiman os nosos montes

Ecos da Comarca/Xeral

Un ano máis, e aquí estamos de novo falando do mesmo tema de sempre, o lume. Parece que en canto chega esta época estival e as temperaturas empezan a subir con forza, todo se volve lumes por todos lados. É unha sensación de impotencia e tristeza que se repite cada verán e que nos obriga a falar moi seriamente do que está a pasar realmente nos nosos montes. O debate nas rúas e nas redes sociais está sempre aceso, e as opinións son de todo tipo, pero moitas veces quedamos na superficie sen ir á raíz do problema.

.

Por unha banda, hai quen di que a culpa de todo a teñen os ecoloxistas, e por outra banda, están os que aseguran que as plantacións de tipo industrial, esas que se estenden por quilómetros, están a mermar a nosa biodiversidade e facilitando que todo arda moito máis rápido e con máis forza. Pero imos deternos un momento a pensar con calma. Un ecoloxista que se considere tal de verdade, nunca o vas ver facendo algo en contra da natureza. O sentimento que esas persoas teñen cara á terra, cara ás árbores e cara a toda a vida que medra no monte é algo moi profundo e difícil de explicar con simples palabras. É unha conexión tan íntima e vital que, se é necesario explicala, posiblemente a persoa que está escoitando nunca o chegaría a entender de todo. Por iso, botarlle a culpa a quen precisamente máis ama o monte non ten ningunha lóxica.

 PUBLICIDADE

Preme na imaxe para obter máis información deste evento.

Despois temos o famoso argumento de que os montes hai que limpalos para que non ardan. Aquí gustaríame facer unha pequena aclaración que considero fundamental. Limpar, o que se di limpar, límpase o baño, a cociña ou o chan da casa. O monte non é unha habitación que poidas deixar impecable cunha vasoira. O monte necesita xestión, necesita coidado constante e necesita ser tratado como o ecosistema vivo e complexo que é.

 PUBLICIDADE

Preme na imaxe para obter máis información do evento.

O problema real de todo isto que vivimos un ano tras outro débese a que a xente deixou de traballar o monte con cabeciña, como se facía antes. Na actualidade, a moitas familias e propietarios xa non lles resulta rendible volver ao monte para traballalo, e ese abandono social e económico é o que crea o perigo real. O monte hoxe en día move moitísimos intereses económicos, e por desgraza, o mundo do lume tamén se converteu nun negocio para algúns.

 PUBLICIDADE

Preme na imaxe para obter máis información do evento.

Temos que facer un esforzo colectivo para deixar de ver o noso entorno natural como se fose un simple polígono industrial do que só hai que sacar a máxima produción posible no menor tempo posible. Debemos empezar a respectar a terra de verdade. Porque, aínda que moitas das propiedades sexan privadas, os problemas que estamos xerando coa falta de previsión e coas malas prácticas son comúns para toda a sociedade galega. Cando o monte arde, o aire que respiramos e o futuro que deixamos é un problema de todos, sen importar de quen sexa a leira. Grazas por dedicar este tempo a reflexionar comigo sobre a saúde dos nosos bosques.