O PSOE denuncia que o Concello "obriga a pagar un mando no parking Europa sen respaldo da ordenanza"

Ecos da comarca/Lalín

O PSdeG-PSOE de Lalín denunciou onte que o goberno de José Crespo, "tras a reorganización imposta no parking Europa, pretende obrigar aos usuarios abonados a pagar un mando de acceso cun custo de 30 euros, un pago que non está recollido na ordenanza municipal que regula o funcionamento e as tarifas deste servizo público". A voceira socialista, Alba Forno, sinala que a normativa vixente só contempla o abono mensual de 30 euros por praza, sen incluír en ningún caso custos adicionais como o do mando, polo que introducir este novo pago sen modificar a ordenanza “xera serias dúbidas sobre a súa legalidade e os usuarios poderían recorrelo, porque non teñen a obriga legal de afrontalo”.

Neste sentido, os socialistas anunciaron que solicitarán un informe ao secretario municipal para aclarar a legalidade desta medida, ao considerar que introducir novos pagos sen respaldo na ordenanza xera dúbidas xurídicas e sitúa aos usuarios nunha situación de inseguridade. Forno subliña que nun servizo público as condicións de uso e os prezos deben estar claramente regulados e aprobados, polo que non se poden introducir novos pagos por decisión unilateral do PP. “Se non está recollido na ordenanza, non se pode esixir. As regras non se poden cambiar a metade do partido”, indica.

Os socialistas consideran, ademais, que esta medida resulta inxusta para os abonados, que xa están a pagar unha cota mensual e que, ao mesmo tempo, ven como se lles empeoran as condicións de uso do parking. A reubicación obrigatoria na planta superior, con accesos máis incómodos e en peores condicións, contrasta coa situación do resto de usuarios, que poden seguir aparcando gratuitamente na planta baixa sen limitación efectiva de tempo, o que, segundo o PSdeG, desvirtúa o modelo de rotación para o que foi concibido o aparcadoiro.

  PUBLICIDADE

Se queres obter máis información do evento preme na imaxe.

Desde o PSdeG tamén critican "a falta de planificación do Concello e sosteñen que se deberían implantar sistemas modernos de acceso mediante a lectura de matriculas, que eviten custos adicionais para a cidadanía". Consideran que o gasto derivado do funcionamento do servizo non debe recaer directamente nos usuarios, senón formar parte da propia xestión municipal.

  PUBLICIDADE

Preme para obter máis información.

Ante esta situación, os socialistas reclaman a retirada inmediata da obriga de pagar o mando, a adaptación do sistema de acceso a un modelo que non supoña custos engadidos para os usuarios e o respecto estrito á ordenanza municipal vixente. “Os servizos públicos teñen que ser claros, xustos e transparentes. Non se pode obrigar á xente a pagar por algo que non está regulado nin aprobado”, concluíu Forno.