O PSOE de Lalín solicita ao goberno local melloras "necesarias" na rúa Ramón Aller

Ecos da Comarca/Lalín

O PSOE de Lalín levará ao vindeiro pleno unha moción a través da cal solicita ao Goberno do Concello de Lalín a redacción dun proxecto e a execución das correspondentes reformas, reparacións e melloras necesarias na rúa Ramón Aller, co fin de garantir a seguridade viaria, a accesibilidade universal e a continuidade peonil dun dos principais eixos urbanos do centro da vila.

"A rúa Ramón Aller, que leva o nome dun dos nosos ilustres máis recoñecidos, discorre polo centro da vila. Iníciase nas inmediacións da Praza da Torre —onde se ergue a estatua en homenaxe ao aviador Joaquín Loriga— e remata no entronque coa avenida Xosé Cuíña nas proximidades do complexo deportivo Lalín Arena. Ao longo do seu percorrido, a rúa alberga algúns dos emprazamentos máis relevantes do noso concello, tanto para a veciñanza como para os visitantes e turistas que nos acompañan ao longo do ano. Destacan, entre outros, o Museo Ramón M. Aller e o Observatorio Astronómico, símbolos culturais da nosa vila. Ademais, conecta con rúas que conducen directamente a puntos estratéxicos como a Casa do Concello ou o Campo da Feira, onde se celebran as tradicionais feiras dos días 3 e 18 de cada mes", indican os socialistas.

Publicidade

Preme na imaxe para obter máis información do evento.

Porén, apuntan que a rúa Ramón Aller presenta "importantes deficiencias que requiren dunha actuación urxente. A principal problemática reside na ausencia de beirarrúas nun treito significativo da vía, o que obriga aos peóns a circular pola calzada, asumindo riscos innecesarios. A isto súmase o habitual crecemento da maleza nalgunhas das fincas colindantes, que chega a invadir os espazos peonís alí onde si existen beirarrúas. Esta situación, agravada pola falta de accesibilidade para carriños infantís ou para persoas con mobilidade reducida, converte o tránsito peonil pola rúa nunha experiencia incómoda e perigosa. Ademais, proxecta unha imaxe negativa dun espazo céntrico e emblemático da nosa vila, tanto para a cidadanía como para quen nos visita. O firme tamén presenta importantes deficiencias, especialmente nas marxes e zonas de estacionamento", indica.

Publicidade

Preme na imaxe se queres contactar connosco.

Por todo isto, consideran "necesario acometer unha reforma integral da rúa Ramón Aller que permita mellorar a seguridade, a accesibilidade e a estética da zona, e avanzar cara unha verdadeira continuidade urbana e peonil que una o centro da vila con Donramiro, contribuíndo á cohesión do tecido urbano e á calidade de vida da veciñanza".