O PSOE de Lalín propón subir de 100 a 150 euros as bolsas escolares e ampliar a partida
Alba Forno reclama adiantar a súa tramitación para que as familias dispoñan dos vales antes do comezo do curso “e non en novembro como pasa agora”
Ecos da Comarca/Lalín
A voceira do PSdeG-PSOE de Lalín, Alba Forno, propón incrementar de 100 a 150 euros por alumno as bolsas municipais para material escolar e adiantar a súa tramitación para que as familias dispoñan dos vales antes do comezo do curso, coincidindo co momento no que teñen que afrontar a maior parte dos gastos. A voceira socialista defende, ademais, incrementar o orzamento destinado ao programa, dotado este curso con 25.000 euros.
Forno, considera necesario actualizar unha axuda que leva anos conxelada nos 100 euros mentres o custo da volta ao cole non deixou de aumentar. A última enquisa da OCU sitúa en 548 euros por alumno o gasto medio inicial das familias en libros, material, roupa e calzado para este curso. “Todo subiu nestes anos, por iso cremos que hai que actualizala a 150 euros e poñer máis recursos para que poida chegar a máis familias.”
PUBLICIDADE
O PSOE cuestiona ademais que o goberno do PP reducise este curso a dotación do programa de 30.000 a 25.000 euros, un 17 % menos, precisamente cando ampliou os límites de renda para permitir o acceso de máis fogares. Para os socialistas, ampliar os posibles beneficiarios é positivo, pero debe ir acompañado de máis orzamento, non dunha redución.
Forno comprométese tamén a adiantar a convocatoria e a resolución para que os vales estean dispoñibles antes do inicio das clases. “Unha axuda para a volta ao cole ten que chegar na volta ao cole, non cando as familias xa pagaron os libros, as mochilas, a roupa e o material”, sinala.
PUBLICIDADE
As bolsas permiten adquirir material escolar, roupa, calzado ou material deportivo en establecementos de Lalín, polo que o PSOE destaca que incrementar o programa supón tamén inxectar máis recursos directamente no comercio local.
Comentarios