O PSOE de Lalín pide a declaración de reparación dos edís e funcionarios municipais represaliados en 1936

Ecos da Comarca/Lalín

Coincidindo coa data na que se cumpren 50 anos da morte de Franco, o PSdeG-PSOE de Lalín presentou unha moción para solicitar que o Concello inicie o expediente administrativo ante o Ministerio de Política Territorial e Memoria Democrática para obter a Declaración de Reparación e Recoñecemento Persoal dos concelleiros e funcionarios municipais represaliados tras o golpe de Estado de 1936.

Nunha comparecencia diante do Concello vello, a secretaria xeral do PSOE de Lalín, Alba Forno, avanzou os detalles da iniciativa e subliñou a súa carga democrática e histórica.

“Estamos aquí nunha data moi sinalada, o 20 de novembro, cando se cumpren 50 anos do falecemento de Franco. É, polo tanto, unha data que simboliza o inicio da democracia da que hoxe desfrutamos”.

“Imos levar ao próximo pleno unha moción para solicitar que o Concello de Lalín tramite o expediente para que o Ministerio de Memoria Democrática declare a reparación e o recoñecemento persoal dos concelleiros e funcionarios que foron represaliados en 1936 tras o golpe de Estado”.

“Esta iniciativa está amparada plenamente na Lei de Memoria Democrática, que obriga ás administracións a identificar, dignificar e reparar ás persoas perseguidas por razón política, ideolóxica ou pola súa función pública”.

Forno destacou o carácter institucional e non partidista da iniciativa: “Isto non vai de ideoloxías nin de ser de dereitas ou de esquerdas. Vai de ser demócratas. É un acto de unidade, de memoria e de dignidade cara ás vítimas e as súas familias, neste caso servidores e representantes públicos”.

“Facémolo coa man tendida a todos os partidos, en particular ao PP, que xa nos votou en contra de iniciativas similares. Só queremos defender a democracia baixo o paraugas da unidade e cumprir a lei. Queremos que sexa un xesto do concello actual ás mesmas persoas que eran concelleiras ou traballadores municipais no 36 e foron perseguidos e asesinados inxustamente por defender a legalidade democrátcica”. 

A moción inclúe unha relación de 13 concelleiros e funcionarios do Concello de Lalín represaliados, documentada polo historiador local Manuel Igrexas, a quen Forno agradeceu expresamente o seu traballo.

 Concelleiros e alcaldes

• Manuel Ferreiro Panadeiro, alcalde fusilado en 1936

• Xesús Golmar Rodríguez, alcalde, preso en San Simón e outros centros

• Luis Frade Pazos, concelleiro asasinado

• Antonio Jar Dobarro, concelleiro detido e multado

• José Blanco Otero, concelleiro e garda municipal, preso en San Simón, San Cristovo, Cuéllar e Brunete

• Marcelino García Villar, concelleiro e funcionario eventual, agochado durante 30 anos

• Julio Calviño Friol, concelleiro detido e procesado

 Funcionarios municipais

• Xesús Froiz Gómez, garda municipal asasinado en 1936

• José Crespo Torres, porteiro municipal fusilado

• Benito Fernández Balboa, garda municipal asasinado en 1937

• Eliseo Garra Lalín, funcionario eventual, asasinado

• Ramiro Granja González, axente executivo, asasinado

• Fernando Goyanes Goyanes, oficial municipal, detido e encarcerado en San Simón

 Publicidade

Preme na imaxe para obter máis información.

Forno subliñou:“Todos eles eran funcionarios públicos e representantes municipais elixidos democraticamente. Foron perseguidos, torturados, multados ou asasinados por defender a liberdade e a legalidade democrática da Segunda República”.

Forno advertiu da preocupación crecente polo descoñecemento histórico, especialmente entre a mocidade. “Hoxe hai xente nova, como vemos nas enquisas, que chega incluso a considerar que Franco non foi tan malo, ou que foi bo. Hai mozos e mozas que ven con bos ollos a ditadura franquista porque non coñecen o que ocorreu, nin o valor real da democracia”.

Publicidade

Preme para contactar con nós e pregunta polas tarifas que son unha bicoca!

“Estamos preocupados polos datos que din que hai persoas, sobre todo novas, que apoian o réxime franquista ou cuestionan a democracia. Por iso isto vai máis alá da moción, é un síntoma ao que debemos responder entre todos e todas, porque na defensa da democracia non podemos dar nin un paso atrás”.

“Quen hoxe cuestiona o sistema, nos cuestiona aos políticos, pode facelo porque vivimos precisamente nunha democracia”. “A mellor forma de honrar estes veciños de Lalín, que percorreron estas mesmas rúas e traballaron nesta casa consistorial, é recoñecer a súa dignidade e pedir a súa reparación con unidade de toda a corporación”.