O PSOE de Lalín pide instalar unha pantalla xigante na Praza da Igrexa para seguir a semifinal do mundial

Os socialistas consideran que sería unha oportunidade para que centos de veciños e veciñas vivan xuntos un acontecemento deportivo histórico e dinamizar o centro da vila

Ecos da Comarca/Lalín

O PSdeG-PSOE de Lalín solicitou ao goberno local a instalación dunha pantalla xigante na Praza da Igrexa para que a veciñanza poida seguir hoxe a semifinal do Mundial que enfrontará á Selección Española contra Francia e, no caso de conseguir a clasificación, tamén a final prevista para o vindeiro domingo.

Foto de arquivo.

Desde o PSOE consideran que se trata dunha ocasión excepcional para converter a Praza da Igrexa nun punto de encontro para afeccionados e familias, permitindo que centos de persoas poidan compartir un acontecemento deportivo que está espertando unha enorme ilusión.

A voceira socialista, Alba Forno, sinala que "non estamos ante un partido máis, España está ás portas dunha nova final dun Mundial e sería bonito que Lalín tamén puidese vivir este momento de maneira colectiva, enchendo a Praza da Igrexa de ambiente".

  PUBLICIDADE

Preme na imaxe para obter máis información deste evento.

Forno lembra que este tipo de iniciativas xa se levan a cabo con éxito en numerosos concellos e supoñen tamén unha oportunidade para dinamizar o centro urbano e apoiar á hostalaría local.

"Cando un acontecemento deportivo consegue ilusionar a todo un país, as administracións tamén poden contribuír a que a cidadanía o desfrute xunta. Cun investimento moi reducido podemos crear un gran ambiente no centro da vila e ofrecer unha alternativa de lecer para todas as idades", destacou.

O Grupo Socialista considera que a Praza da Igrexa reúne as condicións idóneas para acoller esta iniciativa pola súa capacidade, accesibilidade e situación no corazón da vila.

  PUBLICIDADE

Preme na imaxe para obter máis información deste evento.

Por todo iso, o PSOE solicita ao Concello que habilite unha pantalla xigante para a retransmisión da semifinal deste martes e que, no caso de que España consiga o pase, manteña tamén esta iniciativa para a final do próximo domingo.

"Agardamos que o goberno municipal apoie esta proposta e que Lalín poida vivir unido un momento que pode quedar para a historia do deporte español", concluíu Alba Forno.