O PSOE cubrirá as pistas de tenis, construirá novas de pádel e levará a cabo as de atletismo

Mario López, concelleiro e membro da candidatura socialista, asegura que “Lalín

ten moito deporte e merece mellores instalacións, condicións e máis visibilidade”

Ecos da Comarca/Lalín

A concellería de Deportes será de importancia para o Goberno de Alba Forno e por iso

presenta varias medidas para mellorar esta área. “En Lalín temos moito deporte e todos

os clubs se merecen unhas mellores instalacións, condicións e máis visibilidade”, expón o

concelleiro e membro da candidatura socialista lalinense, Mario López. Así mesmo, indica

que “hai moitos clubs que están facendo un enorme traballo, traendo competicións para

Lalín e poñendo ao noso concello no máis alto do mundo deportivo”.

Entre as propostas, está mellorar as axudas deportivas e a súa xestión, que foi unha das

demandas máis escoitada nas reunións cos diferentes clubs. Por iso, propoñen que os

pagos se realicen no comezo do ano e a súa petición ao pouco de empezar a tempada

cada club. Así mesmo, dende o grupo socialista promoverase e favorecerase a práctica

deportiva de deportistas con diversidade funcional, facilitándolle medios e instalacións

para a súa práctica.

En canto a instalacións, unha das propostas é cubrir unha das pistas de tenis situadas a

carón do pavillón polideportivo, “que permitirá que durante o inverno tamén poidan ser

empregadas, como nos solicita a veciñanza”. Así mesmo, actualmente a veciñanza de

Lalín trasládase ao concello veciño de Silleda para poder practicar pádel, posto que as

pistas que se encontran no Lalín Arena son insuficientes. “Son moitas as persoas que

neste momento practican este deporte de maneira profesional, por iso consideramos que

hai que mellorar as que hai actualmente, xa que en moitas ocasións presentan un mal

estado pola choiva, e crear novos espazos”, explica López. Por iso, propoñen construír

novas pistas de pádel na zona de aparcamento do Lalín Arena, xunto as que hai

actualmente.

Preme na imaxe se queres contactar connosco.

En canto ás pistas de atletismo, como xa foi anunciado en varias ocasións, dende o

PSOE estiveron en contacto cos propietarios dos terreos e acordaron mercar 25.000 m 2

para a construción de ditas instalacións. “Esta foi unha das grandes promesas do PP que

non foi nin capaz de comezar. Enganou tanto ao Club como á veciñanza, asegurando que

tiña acordo que logo nin existía. Ademais, negoulle reunións aos propietarios e a única vía

que contempla é a expropiación, porque é o seu xeito de actuar. Nós preferimos o diálogo

e que todo o mundo saia beneficiado”, recalca. Ante isto, consideran que o espazo

acordado cos propietarios é o xusto para contar con todas as disciplinas de atletismo e

ademais poderase contar co campo de rugby, que permitirá desconxestionar o Manuel

Anxo Cortizo.