Demanda que se reúna de inmediato a Xunta Local de Seguridade para analizar os últimos acontecementos
Ecos da Comarca/Melide
O PP de Melide solicita que se reúna de inmediato a Xunta de Seguridade Local para analizar "a situación de inseguridade do municipio" e se reforce a presenza das Forzas e Corpos de Seguridade do Estado ante o aumento de poboación no núcleo urbano nos meses de verán e despois dos últimos acontecementos acaecidos nesta vila. “No día de onte (por este martes) houbo novamente dous intentos de roubos no mesmo centro do pobo o que prexudica a imaxe de Melide, do Camiño de Santiago e aos propios veciños e comerciantes”, sinala Dalia García, a portavoz do PP de Melide.
Os populares denunciaron hai días esta situación que se saldou coa detención nos últimos días dun sospeitoso de realizar ata seis substraccións. A portavoz dos populares melidenses sinala que “pedirán responsabilidades de si se reforzou ou non a seguridade dende que o PP o pediu así como instan ao bipartito AM-PSOE a reunir a Xunta Local de Seguridade inmediatamente e analizar a situación de roubos continuados no municipio para reforzar a vixilancia e impedir, na medida do posible, situacións de inseguridade
recorrente no municipio que danan a imaxe de Melide e do Camiño de Santiago”.
