O PP de Agolada denuncia "o illamento do Concello" tras quedar fóra da mancomunidade de Deza-Tabeirós

Ecos da Comarca/Agolada

O PP de Agolada denuncia "o illamento deste Concello tras quedar fóra da mancomunidade Terras de Deza-Tabeirós". "O noso municipio volve quedar á marxe das decisións estratéxicas da contorna ao ser o único concello da comarca, do norte da provincia de Pontevedra e da súa área de influencia que non se integra na nova mancomunidade Terras de Deza-Tabeirós, recentemente ampliada coa incorporación de A Estrada, Forcarei e Dozón".

Dende o PP consideran que esta situación "evidencia unha absoluta falta de ambición e responsabilidade por parte do goberno local, ao renunciar a formar parte dun organismo clave para a xestión compartida de servizos, a captación de investimentos e a mellora da calidade de vida dos veciños".

A portavoz popular, Carmen Seijas, é especialmente crítica ao sinalar que “é incomprensible que Agolada quede illada mentres todos os concellos da contornaapostan pola cooperación. Isto non vai de siglas, vai de traballar polos veciños, e aquí estase facendo xusto o contrario”.

Seijas engade que “nesta mancomunidade hai concellos de todas as cores políticas, do Partido Popular, do Partido Socialista e doutras formacións, o que demostra que aprioridade é sumar esforzos e non levantar muros, como está facendo o goberno de Agolada”.

 PUBLICIDADE

Se queres obter máis información do evento preme na imaxe.

A portavoz popular vai máis alá e asegura que “este novo goberno de Óscar Val segue exactamente a mesma liña que o anterior de Luis Calvo: illamento, falta de iniciativa e rexeitamento a colaborar con outras administracións”. Neste sentido, afirma que “queda claro que son o mesmo proxecto, coa mesma forma de pensar e coa mesma maneira de actuar, e quen o paga son os veciños de Agolada”.

Dende o PP consideran que esta decisión “non só resta oportunidades ao municipio, senón que o condena a quedar atrás mentres o resto da comarca avanza unida”.

 PUBLICIDADE

Preme para obter máis información.

Por todo isto, os populares esixen ao goberno local que abandone “esta actitude de illamento permanente” e que inicie de inmediato os trámites necesarios para a incorporación de Agolada á mancomunidade Terras de Deza-Tabeirós, “poñendo dunha vez por todas os intereses dos veciños por riba de calquera outro cálculo político”.