O Partido Popular de Vila de Cruces desminte as afirmacións de Luís Taboada

Ecos da Comarca/Vila de Cruces

O Grupo Municipal do Partido Popular de Vila de Cruces quere responder á nota de prensa emitida polo alcalde Luís Taboada, que, "lamentablemente, se caracteriza por mentirlle tanto a toda a corporación, incluíndo os do seu propio partido, e os veciños do Concello sobre a situación da obra de traslado da EDAR do polígono industrial de O Camballón. En primeiro lugar, reiteramos que a obra a que se refire da depuradora foi

oficialmente recepcionada o pasado 12 de novembro polo Concello, desmentindo así as declaracións do alcalde sobre a súa situación actual".

Ademais, sinala, "constatamos que a afirmación de que o traslado da depuradora está a ser realizado exclusivamente por operarios municipais non se corresponde coa realidade. É importante sinalar que existe unha empresa local que está a traballar no traslado, xunto cos operarios de Vías e Obras do Concello. O alcalde deberá proporcionar aclaracións sobre a existencia de calquera contrato con esta empresa e como se van a abonar os traballos realizados, dado que esta situación suscita graves dúbidas sobre a xestión dos recursos públicos".

Máis alá deste asunto, apunta, "o que realmente nos preocupa é a xestión irregular do señor alcalde en relación a esta infraestrutura. O primeiro proxecto certificou que a instalación estaba lista para a súa utilización, cando en realidade non tiña conexión á rede, motivo polo cal se están a realizar estas obras actualmente. Despois de outro proxecto de substitución de colectores para poder conectarse á EDAR, o alcalde volve a certificar e recepcionar a obra sen que esta estea completamente conectada á rede".

Publicidade

Preme na imaxe se queres contactar connosco.

"É inaceptable que, tras un gasto superior a 300.000 euros e despois de dous proxectos, sexa Vías e Obras do Concello xunto cunha empresa local quen teña que executar os traballos que deberían estar correctamente realizados desde o principio. Esta é a terceira ubicación da EDAR e dende este grupo cremos que non será a última. Esta situación é un exemplo claro da falta de xestión e transparencia no uso dos impostos dos veciños, e denunciamos as irregularidades cometidas durante estas intervencións".

O Partido Popular, recalca, "seguirá a esixir responsabilidades e a defender os intereses dos veciños de Vila de Cruces, porque a boa xestión e a transparencia son fundamentais para o progreso do noso concello".